Սեպտեմբերի 27-ին ՀՀ արտաքին գործերի նախարար Զոհրաբ Մնացականյանը Նյու Յորքում հանդիպեց Էստոնիայի արտաքին գործերի նախարար Սվեն Միկսերի հետ:
ԱԳՆ-ից NEWS.am-ին հայտնում են, որ Զոհրաբ Մնացականյանը նշեց, որ Հայաստանը կարեւորում է Էստոնիայի հետ փոխշահավետ համագործակցության ընդլայնումը երկկողմ հետաքրքրություն ներկայացնող բոլոր ոլորտներում:
ԱԳ նախարարներն անդրադարձ կատարեցին Հայաստան-Եվրամիություն գործընկերությունը՝ այդ համատեքստում կարեւորելով Համապարփակ եւ ընդլայնված գործընկերության համաձայնագիրը, որը համագործակցության հեռանկարներ է բացում ինչպես ՀՀ-ԵՄ հարաբերություններում, այնպես էլ՝ ԵՄ անդամ երկրների հետ երկկողմ ձեւաչափում: Այս համատեքստում մտքեր փոխանակվեցին նաեւ Հայաստան-Եվրամիություն պայմանավորվածությունների իրականացման ուղղությամբ քայլերի իրագործման շուրջ։
Հայաստանի եւ Էստոնիայի արտաքին քաղաքական գերատեսչությունների ղեկավարները մանրամասն անդրադարձան Երեւանում հոկտեմբերին կայանալիք ՖՄԿ գագաթաժողովի նախապատրաստական աշխատանքներին, օրակարգին, նախատեսվող հարակից միջոցառումներին, ինչպես նաեւ մասնակիցների հավանությանը ներկայացվելիք փաստաթղթերին:
Նախարար Մնացականյանը ներկայացրեց կազմակերպությունում Հայաստանի նախագահության առաջնահերթությունները՝ որպես հիմնական ուղղություն առանձնացնելով նորարարությունը եւ թվային օրակարգը: Այս առումով Հայաստանի եւ Էստոնիայի ԱԳ նախարարները գոհունակությամբ արձանագրեցին տեղեկատվական տեխնոլոգիաների ոլորտում հաստատված պտղաբեր երկկողմ համագործակցությունը՝ այդ առնչությամբ ընդգծելով փորձի փոխանակմանն ուղղված ծրագրեր ու միջոցառումներ նախաձեռնելու կարեւորությունը:
Զրուցակիցները գոհունակությամբ ընդգծեցին երկկողմ մշակութային կապերի աշխուժացումը եւ պարբերաբար կազմակերպվող մշակութային միջոցառումների կարեւորությունը՝ որպես օրինակ բերելով Երեւանում եւ Տալլինում Էստոնիայի եւ Հայաստանի հանրապետությունների 100-ամյա հոբելյաններին նվիրված միջոցառումների անցկացումը:
