Որպեսզի երկիրը կարողանա շատ ներդրումներ ներգրավել իր սթարթափների համար, այն պետք է ունենա ուժեղ ձեռներեցական եւ ներդրողական էկոհամակարգ եւ լավ կրթահամակարգ, որը տեխնոլոգիաների ոլորտում նոր գաղափարներ հղանալու հնարավորություն է տալիս։ Ինչպես նաեւ, անհրաժեշտ են ծրագրեր-ակսելերատորներ՝ սկսնակ ընկերություններին օգնելու համար, եւ, իհարկե, պետական աջակցություն։ «Go Beyond Early Stage Investing»-ի հմնադիր Բրիջիդ Բաումանը համարում է, որ այս ամենը Հայաստանում կա։
Բրիջիդ Բաումանը Հայաստան է եկել մասնակցելու Early stage investment conference համաժողովին՝ նվիրված սթարթափներում, այսպես կոչված, «հրեշտակային» ներդրումներին։ Դրանք, ինչպես նշել է մասնագետը, սովորաբար կազմում են սթարթափի ընդհանուր բյուջեի 2-5 տոկոսը, սակայն բիզնես-հրեշտակները բոլոր մասնավոր ներդրողներից տարբերվում են նրանով, որ «երկու թեւ» ունեն՝ ոչ միայն ֆինանսական աջակցություն են ցուցաբերում, այլեւ աջակցում են սթարթափ-նախագծին, կիսում են իրենց փորձը, նպաստում են դրա զարգացմանը եւ միջազգային ասպարեզ դուրս գալուն։
Համաժողովը, ինչպես NEWS.am-ի թղթակցին ասաց GlobalAM-ի ղեկավար Գեւորգ Պողոսյանը, կազմակերպվել է Հայաստանի բիզնես-հրեշտակների ցանցի (BANA) եւ Հայաստանում փոքր եւ միջին ձեռնարկատիրության զարգացման ԵՄ ծրագրի կողմից։ Դրա գլխավոր նպատակը Հայաստանի եւ Եվրոպայի բիզնես-հրեշտակների մերձեցումն է, նրանց համար համագործակցության եւ համատեղ ներդրումների նոր հնարավորությունների ստեղծումը։
«Եվրոպական բիզնես-հրեշտակները մեծ փորձ ունեն։ Նրանք շատ բան կարող են սովորեցնել հայկական ներդրողներին։ Բացի այդ, որոշ եվրոպական բիզնես-հրեշտակներ կարող են շահագրգռված լինել հայկական խոստումնալից սթարթափներում ներդրում անելու մեջ»,- ընդգծեց Գ․ Պողոսյանը։