Ադրբեջանական լրատվամիջոցների տեղեկությունները, թե Լիտվան Լեռնային Ղարաբաղի վերաբերյալ բանաձեւ է մշակել, որում գերակայությունը տրվում է պետությունների տարածքային ամբողջականության սկզբունքին, լիակատար ապատեղեկատվություն է: Այդ մասին NEWS.am-ի թղթակցի հետ զրույցում հայտարարել է Հանրապետական կուսակցության խմբակցության քարտուղար Էդուարդ Շարմազանովը` մեկնաբանելով ադրբեջանական լրատվամիջոցների լուրը, թե նման հայտարարություն Բաքվում արել է Լիտվայի սեյմի խոսնակ Իրենե Դյագուտենեն:
Շարմազանովի խոսքով, միջազգային հանրությունը` ի դեմս ԵԱՀԿ Մինսկի խմբի, տարբեր կազմակերպությունների, բազմիցս հայտարարել է, թե ղարաբաղյան հակամարտությունը պետք է կարգավորել երեք սկզբունքների` ժողովուրդների ինքնորոշման, պետությունների տըարածքային ամբողջականության եւ ուժի չկիրառման սկզբունքների հիման վրա:
«Առանձին վերցրած տարածքային ամբողջականության սկզբունքը չի կարող կիրառվել ղարաբաղյան խնդրի նկատմամբ: Դա ադրբեջանական լրատվամիջոցների հերթական ապատեղեկատվությունն է»,- ասել է Շարմազանովը:
Ըստ ադրբեջանական լրատվամիջոցների` Իրենե Դյագուտենեն իբր հայտրարարել է, թե բանաձեւի տակ արդեն ստորագրել են խորհրդարանի 50 պատգամավորներ: