Դա ինձ համար սովորական երեւույթ է: Այս մասին այսօր՝ սեպտեմբերի 30-ին լրագրողների հետ զրույցում հայտարարեց ՀՀ վարչապետ Նիկոլ Փաշինյանը՝ պատասխանելով պատիվն ու արժանապատվությունը պաշտպանելու համար ՀՀ երկրորդ նախագահ Ռոբերտ Քոչարյանի կողմից դատարան հայց ներկայացնելու մասին հարցին:
«Դա ինձ համար սովորական երեւույթ է: Արդեն 25 տարի է՝ Ռոբերտ Քոչարյանն ու Սերժ Սարգսյանն ինձ դատի են տալիս: Եվս մի 25 տարի իրենց առողջություն տա Աստված, որ շարունակեն դատի տալ»,- ասաց Փաշինյանը:
Ավելի վաղ հայտնել էինք, որ նախկին նախագահը Փաշինյանի դեմ Երեւանի ընդհանուր իրավասության դատարան հրապարակայնորեն արտահայտված զրպարտությունից պատիվը եւ արժանապատվությունը պաշտպանելու պահանջի մասին հայց է ներկայացրել: Ռոբերտ Քոչարյանի ներկայացուցիչ Հայկ Ալումյանի խոսքով՝ հայցադիմում ներկայացնելու առիթը Ֆրանսիա կատարած այցի ժամանակ Նիկոլ Փաշինյանի հրապարակային հայտարարությունն է, որը վերաբերել է Ռոբերտ Քոչարյանին:
Հայ համայնքի հետ հանդիպման ժամանակ Փաշինյանը պարզաբանումներ է ներկայացրել ԱԱԾ տնօրենի եւ ՀՔԾ պետի հեռախոսազրույցի վերաբերյալ, որը վերաբերել է երկրորդ նախագահին: Խոսքը, մասնավորապես, վարչապետի հետեւյալ հայտարարության մասին է. «Կամ թեկուզ Ռոբերտ Քոչարյանին ազատ արձակելու մեկնաբանությունը: Ասում է՝ անձեռնմխելի է: Ի՞նչ է նշանակում անձեռնմխելի: Այսինքն` կարելի է մարդկանց սպանությունը կազմակերպել ու ասել՝ «Ես անձեռնմխելի՞ եմ»: Այդ որտե՞ղ է այդպես գրած»:
