Առայժմ հայտնի չէ, թե ՌԴ նախագահ Վլադիմիր Պուտինը երբ Հայաստան կգա: Այսօր՝ սեպտեմբերի 30-ին լրագրողների հետ զրույցում ՀՀ վարչապետ Նիկոլ Փաշինյանն ասաց՝ ճիշտ կլինի, որ նա Երեւան այցելի հաջորդ տարվա սկզբին:
«Նախապես պայմանավորվածությունը եղել է, որ կա՛մ այս տարվա վերջ, կա՛մ մյուս տարվա սկիզբ: Ես կարծում եմ՝ ճիշտ կլինի, որ մյուս տարվա սկիզբ լինի այցը, որպեսզի մենք փաստաթղթային որոշակի բազա ունենանք, որպեսզի այդ ընթացքում ստորագրվի: Եվ ես հույս ունեմ, որ այս ընթացքում մենք պայմանագրային շատ լուրջ փաթեթ կունենանք»,- պարզաբանեց Փաշինյանը:
Իսկ Դուշանբեում Պուտինի հետ, նշեց վարչապետը, քննարկել են իրենց հանդիպումը. «Գագաթնաժողովի ավարտին մենք նորից հանդիպեցինք եւ առանձնազրույց ունեցանք, եւ պայմանավորվում էինք այդ հանդիպման մասին»:
