Նորք-Մարաշում վնասազերծված զինված խմբի «պարագլուխ» Արթուր Վարդանյանը կմնա կալանքի տակ։ Այսօր՝ 2018 թ. հոկտեմբերի 1–ին Երեւանի ընդհանուր իրավասության դատարանը՝ դատավոր Արմեն Բեկթաշյանի նախագահությամբ մերժել է Վարդանյանին 1 մլն դրամ գրավի դիմաց ազատ արձակելու պաշտպանական կողմի միջնորդությունը։
NEWS.am–ի հետ զրույցում Վարդանյանի փաստաբաններից Սիրուշ Աղվանյանը նշեց, որ առաջիկայում հնարավոր է նրա խափանման միջոց կալանավորումը փոխելու վերաբերյալ նոր միջնորդությամբ հանդես գան։
Հիշեցնենք, որ նախորդ դատական նիստին Վարդանյանի պաշտպան Լեւոն Բաղդասարյանը հայտարարել էր, որ պատգամավորները պատրաստակամություն են հայտնել իր պաշտպանյալի համար անձնական երաշխավորություն ներկայացնել, ինչի համար դատարանը կողմին ժամանակ տրամադրեց։ Ավելի ուշ հայտնի դարձավ, որ տեխնիկական խնդիրների պատճառով պատգամավորներն անձնական երաշխավորություն չեն ներկայացնի։
Ի դեպ՝ Վարդանյանը միակ ամբաստանյալն է, ով այս գործով գտնվում է կալանքի տակ։
Նշենք, որ վերջին երեք ամիսների ընթացքում այս գործով կալանքից ազատվել են շուրջ մեկ տասնյակ ամբաստանյալներ՝ այդ թվում պաշտպանության նախկին փոխնախարար Վահան Շիրխանյանը։ Մյուսների նկատմամբ ընտրված է եղել այլ խափանման միջոց։
Հիշեցնենք, որ 2015-ի նոյեմբերի 25-ին ԱԱԾ-ն հայտարարություն տարածեց այն մասին, որ Նորք–Մարաշում վնասազերծվել է զինված խումբ:
Ըստ մեղադրանքի՝ Արթուր Վարդանյանի գլխավորած՝ 2015 թվականին Նորք-Մարաշում վնասազերծված 20 հոգանոց զինված խումբը ծրագրել է բռնությամբ զավթել իշխանությունը: Մասնավորապես, թռիչքի պահին խոցել նախագահի օդանավը, հարձակում գործել ՀՀ նախագահի նստավայրի, Ազգային ժողովի, Սահմանադրական դատարանի, Կառավարության, Հանրային հեռուստաընկերության եւ այլ հաստատությունների շենքերի վրա: