նախընտրելի դարձնելԵս իմ մանդատի տերն եմ, դեմ եմ արտահերթ ընտրությունների անցկացմանն՝ անկախ ժամկետներից։ Այս մասին այսօր՝ հոկտեմբերի 1–ին խորհրդարանում լրագրողների հետ ճեպազրույցում հայտարարեց ԱԺ փոխնախագահ, ՀՀԿ խոսնակ Էդուարդ Շարմազանովը։
Պատգամավորը նշեց, որ հայտնի չէ Փաշինյանի հետ արտահերթ խորհրդարանական ընտրություններ անցկացնելու շուրջ բանակացությունների օրակարգը։
Նրա խոսքով՝ հանդիպման օրակարգը դրել է վարչապետը. «Հանրապետականն ունի իր դիրքորոշումը, ուզում ա լսենք՝ տենանք էդ մարդն ի՞նչ ա ասում, կլսենք, Վահրամ Բաղդասարյանը կգա ՝ կուսակցությունով կքննարկենք»,–ասաց նա։
Շարմազանովը նշեց, որ, ի տարբերություն ուրիշների, իրենք մինչև բովանդակությանը չեն ծանոթանում, առաջարկ չեն ստանում՝ որոշում չեն կայացնում։
«Եթե կլինի առաջարկ, Վահրամ Բաղդասարյանը կհանդիպի վարչապետի հետ, կգա, կնստի՝ կքննարկենք. կամ կորոշենք՝ կասենք՝ այո, կամ՝ կասենք ոչ։ Մենք դեռ չգիտենք Փաշինյանն ինչ է առաջարկում»,–նշեց նա։
Դիտարկմանը, թե համաձա՞յն է, որ մինչև դեկտեմբեր արտահերթ ընտրություններ տեղի ունենան, Շարմազանովը պատասխանեց. «Ես իմ մանդատի տերն եմ, դեմ եմ՝ անկախ ժամկետներից: Ընտրությունների տարբեր ձևեր կան. հրատապ ընտրություններ, արտահերթ, կա ընտրությունների պարտադրում հասարակության կամ իր կողմնակիցների կողմից։ Ես ասել եմ, որ մենք դեմ ենք առճակատումներին, մեր երկրում հակառակորդներ և թշնամիներ չունենք, բայց մենք մեր երկրում պետք է անենք ամեն ինչ, որպեսզի իշխանությունների տարանջատումը պահպանվի»,–ասաց նա։
Ըստ Շարմազանովի՝ այսօր փաստացի Ազգային ժողովը միակ քաղաքական մարմինն է, որը կարող է քիչ թե շատ հավասարակշռել Փաշինյանի միանձնյա իշխանությունը։
«Ու՞ր ենք գնում, դեպի դիկտատուրա՞, թե դեպի Նիկոլ Փաշինյանի պաշտանմունք։ Ես դեմ եմ դրան։ ՀՀԿ–ն ամիսներ առաջ դեռ ասել է, որ պատրաստ է քննարկել և ընտրական օրենսգիրքը և արտահերթ ընտրությունների հնարավորության հարցը, բայց դա չի նշանակում, որ եթե Փաշինյանն այսպես անի՝ ԱԺ–ն պիտի լուծարենք և իր քիմքին համապատասխան ԱԺ ընտրենք»,–նշեց նա։
Շարմազանովի խոսքով՝ յուրաքանչյուր երկրում օրենսդիր մարմինն ընտրվում է որոշակի ժամկետով և իրենք մինչև 2022թ. աշխատելու մանդատ ունեն։
«Իրենք ասում են, որ ժողովրդի կարծիքն է դա, բայց ժողովրդի կարծիքը կարող է վեց ամիսը մեկ փոխվել, ի՞նչ է, վեց ամիսը մեկ պետք է ընտրությու՞ն անենք»,–ասաց նա։
Դիտարկամնը, թե հասարակական ճնշման արդյունքում ի վերջո Սերժ Սարսգյանը հրաժարական տվեց, հետևաբար նույն եղանակով էլ ԱԺ–ն կարող է լուծարվել, Շարմազազնովն արձագանքեց.
«Կա շատ լուրջ տարբերություն։ Այն ժամանակ Սերժ Սարգսյանի ու Հանրապետականի ուսերին էր դրված ողջ պատասխանատվությունը, եթե Աստված մի արասցե ձեզնից որևէ մեկի քթից արյուն գար՝ պատասխանատուն մենք էինք, իսկ այսօր, եթե ձեր կամ իմ քթից արյուն գա՝ դրա պատասխանատուն կառավարությունում նստած Նիկոլ Փաշինյանն է։ Այսինքն այն ժամանակ մեզ վրա էր պատասխանատվությունը և մենք չգնացինք առճակատման, ցնցումների»։
Շարմազանովը հայտարարեց, որ հասարակական պահանջն իր համար վերին ճշմարտություն չէ։
«Եթե նույնիսկ հասարակական պահանջ լինի, որ Հայաստանում լինի 100 տոկոսանոց մի անձի պաշտանմունք կամ մի անձի իշխանություն՝ ես դրան դեմ եմ։ Հասարակական պահանջն ինձ համար վերին ճշմարտություն չէ։ Երբ Նոյ նահապետն իր տապանը կառուցում էր՝ հասարակական պահանջ չկար, ավելին, հասարակական կարծիքը ղժժում էր Նոյի վրա, բայց տեսան, թե ով էր ճիշտը, ով՝ սխալ»,–հայտարարեց նա։
