Կորեայի Հանրապետության ամեն 10 քաղաքացուց 6-ը Հարավի ու Հյուսիսի միավորումը անհրաժեշտ է համարում։ Այս տվյալները վերցված են հանրային կարծիքի հարցումից, որը երեքշաբթի հրապարակել է Սեուլի պետական համալսարանին կից Միավորման եւ խաղաղության հարցերով կենտրոնը, փոխանցում է ՏԱՍՍ–ը։

Հաստատական պատասխան է տվել հարցվածների 59.8 տոկոսը, որը 2007 թվականից ի վեր ամենաբարձր ցուցանիշն է, երբ անցկացվել  է պատմության մեջ 2-րդ միջկորեական գագաթնաժողովը։ Որպես միավորման օգտին փաստարկ հարցվածների 45.1 տոկոսը բերել է  կորեական ժողովրդի միասնությունը, 31.4 տոկոսը՝ պատերազմի սպառնալիքը վերացնելու անհրաժեշտությունը, 12.9 տոկոսը՝ միասնական Կորեան զարգացած երկիր դարձնելը։

Միավորման դեմ են հանդես եկել հարցվածների 34.6 տոկոսը։ Նրանց կարծիքով՝ դա կարող է հանգեցնել տնտեսական մեծ ծախսերի ու սոցիալակաան խնդիրների։

Հարցմանը մասնակցել է 19-74 տարեկան 1200 մարդ։ Վիճակագրական սխալի հավանականությունը կազմում է 3.4 տոկոս։