Հոկտեմբերի 2-ին ԱԺ-ն քննարկեց գազի եւ էլեկտրականության բաշխիչ համակարգերի գործունեության ուսումնասիրման ժամանակավոր հանձնաժողովի անդամների թվի որոշման, ինչպես նաեւ հանրապետությունում գործող սակագների հիմնավորվածության հարցը:
Հանձնաժողովի գործունեության էությունը խորհրդարանականներին ներկայացրեց նախաձեռնող խմբի անդամ, «Ծառուկյան» դաշինքից ընտրված ԱԺ փոխխոսնակ Միքայել Մելքումյանը: Նրա խոսքով՝ ավելի վաղ, մոտ 5 տարի առաջ ԱԺ-ում արդեն ստեղծվել էր հատուկ հանձնաժողով, որը խորհրդարանին հաշվետվություն էր ներկայացրել: «Ցավոք, արդեն 5 տարի է անցել, եւ այդ ժամանակ ԱԺ ընդունած որոշումների 90 տոկոսից ավելին այդպես էլ չեն կատարվել: Դա վերաբերում է ինչպես կորուստներին, այդպես էլ գնումների համակարգին, ինչպես նաեւ բնակչության ու գործարար միջավայրի համար գազի եւ էլեկտրականության սակագների արդարացիության հետ կապված խնդիրներին»,- պարզաբանեց Մելքումյանը:
Նշենք, որ հանձնաժողովի նախագահի պաշտոնում առաջարկվում է առաջադրել հենց իրեն՝ Մելքումյանին: Ընդ որում՝ հանձնաժողովը կազմված կլինի 11 խորհրդարանականներից՝ 5 անդամ ՀՀԿ-ից, 3՝ «Ծառուկյան» դաշինքից, 2՝ «Ելքից» եւ 1՝ Դաշնակցություն խմբակցությունից:
Նախօրեին ԱԺ խոսնակ Արա Բաբլոյանը հայտնել էր, որ անհրաժեշտ թվով խորհրդարանականների պահանջով խորհրդարանում ստեղծվել է հատուկ հանձնաժողով էներգակիրների սակագների հիմնավորվածությունն ուսումնասիրելու համար:
