Մ4 Երեւան-Սեւան-Իջեւան-Ադրբեջանի սահման կմ 110+900-կմ - 118+300 հատվածում պարբերական պահպանման՝ միջին նորոգման աշխատանքներ իրականացնելու նպատակով կառավարությունը պահուստային ֆոնդից Տրանսպորտի, կապի եւ տեղեկատվական տեխնոլոգիաների նախարարությանը 439 մլն 268,7 հազար դրամ կհատկացնի: Նման որոշում ընդունվեց այսօր՝ հոկտեմբերի 4-ին, կառավարության նիստում:
Որոշման հիմնավորման մեջ նշվում է հետեւյալը. «Մ4,Երեւան-Սեւան-Իջեւան-Ադրբեջանի սահման միջպետական նշանակության ավտոճանապարհի կմ 110+900 – 118+300 7.4 կմ երկարությամբ ճանապարհահատվածը վերջին անգամ նորոգվել է 2002 թվականին եւ գտնվում է գերմաշված վիճակում:
Խուսափելով ճանապարհահատվածի հետագա քայքայումից եւ հաշվի առնելով, որ Մ6, Վանաձոր-Ալավերդի-Վրաստանի սահման ճանապարհը վերակառուցման պատճառով փակ է ավտոմեքենաների երթեւեկության համար ինչի պատճառով բեռնափոխադրումների մեծ մասը եւ մարդատար ավտոմեքենաների հոսքը դեպի հանրապետություն եւ դուրս կատարվում են Մ4 ավտոճանապարհով, անհրաժեշտություն է առաջացել նորոգել վերը նշված ճանապարհահատվածի ծածկը:
Միեւնույն ժամանակ անհրաժեշտ է նկատի ունենալ նշված ճանապարհի կարեւորությունը զբոսաշրջության ներգրավման տեսանկյունից»: