Ժողովուրդը ուզում է դեկտեմբերին, ուրեմն մենք էլ ենք ուզում, մենք այդպիսի խնդիր չունենք: Այս մասին «Կենտրոն» հեռուստաընկերության «Ուրվագիծ» հաղորդաշարի եթերում ասաց ԲՀԿ նախագահ, ՀՀ ԱԺ «Ծառուկյան» խմբակցության ղեկավար Գագիկ Ծառուկյանը:
Նրա խոսքով, Սերժ Սարգսյանը, Ռոբերտ Քոչարյանը, Լեւոն Տեր-Պետրոսյանը ԲՀԿ-ի հետ կապ չունեն եւ չեն կարող ԲՀԿ-ի միջոցով գալ իշխանության. «Եթե այդպիսի բան լինի, ուրեմն ես անբարոյական ընտանիքի զավակ եմ: Ես չեմ կարող մարդկանց հասցեին, որոնք եղել են մեր երկրի առաջին դեմքերը, որեւիցե այլ կերպ արտահայտվելու: Հերիք է ժողովրդին, ցեխ շպրտելով, ֆռռցնելով... էս ժողովուրդը մեղք է»,-ասաց նա:
Ծառուկյանը հայտարարեց, որ սեպտեմբերի 23-ին տեղի ունեցած Երեւանի ավագանու ընտրություններին 12 թաղապետերը եւ մեծահարուստ օլիգարխները աջակցել են գործող իշխանության թեկնածուին. «Նրանք, ով իշխանություն է, նրա կողքին են: Հիմա նրանք ո՞ւմ են աջակցել, բոլորն էլ գիտեն»:
Ինչ վերաբերում է ԱԺ արտահերթ ընտրությունների ժամկետներին, ԲՀԿ առաջնորդը հայտարարեց. «Եթե ժողովուրդն ուզում է դեկտեմբերին, ուրեմն մենք էլ ենք ուզում դեկտեմբերին: Մենք այդպիսի խնդիր չունենք: Իմ ժողովրդի ցանկությունից մեկ քայլ հետ գնացող չկա»: Նա նկատեց, որ կառավարության ծրագրով քայլեր են նախատեսված, որոնք կատարելուց հետո պետք է լինեն ընտրություններ, եթե դա կհասցնեն դեկտեմբերին, թող լինի դեկտեմբերին. «Մենք չենք ասում՝ չենք ուզում դեկտեմբերին: Մենք իրա կողքին եղել ենք, կանք, այսինքն մենք ժողովրդի հետ ենք»,-ասաց Ծառուկյանը՝ հավելելով, որ հրատապ ԱԺ ընտրություններ կազմակերպելու պատճառն այն է, որ Երեւանի ընտրությունները վերածեցին հեղափոխության, հիմա նույնը ուզում են անեն ԱԺ ընտրություններում՝ առանց ընտրական օրենսգիրք փոխելու: «Եթե ժամանակ անցնի, ասածները իրականություն չի դառնում, ինչ ժողովուրդը սպասում է, դա խանգարող կլինի: Բայց մենք պատրաստ ենք, ինատ չենք անում»,-ընդգծեց նա:
Ծառուկյանը վստահություն հայտնեց, որ հեղափոխությունն արդեն իրականություն է եւ հակահեղափոխական չի կարող լինել. «Եթե մարդիկ ցայտնոտի մեջ են ընկնում, իրենց հետին մտքերից են ընկնում: Ես պարզ ու մաքուր եմ»:
Անդրադառնալով իր հետագա գործունեությանը նա տեղեկացրեց, որ հանդիպելու է արտախորհրդարանական ուժերի հետ, որոնք հանդիպում չեն ունեցել եւ չեն համագործակցել Ռոբերտ Քոչարյանի եւ Սերժ Սարգսյանի հետ. «Նախապատրաստական աշխատանքներ եմ կատարելու խորհրդարանական ընտրությունների համար»:
Ծառուկյանը վստահեցրեց, որ եթե անգամ նախկինում կառավարության մաս էին կազմում, իսկ հիմա՝ ոչ, իր համար դա ոչ մի բան չի փոխել:
Ճշտող հարցին՝ նշանակում է հակահեղափոխությանը չի միացել, Գագիկ Ծառուկյանը պատասխանեց. «Հեղափոխության կողմնակիցն եմ եղել եւ այսօր ավելի շատ եմ անելու, պատասխանատվությունը ինձ վրա է, գալիս են 25 երկրներից 5 հազար ներդրողներ՝ ներդրումների համար»:
Գագիկ Ծառուկյանը պարզաբանեց, որ ներդրողների հոսքը կանգնել է ոչ թե այն պատճառով, որ արտահերթ ընտրություններ չեն լինում, այլ բոլորովին այլ պատճառով. «Հիմա ներդրումների հոսքը կանգնել է, բայց կանգնել է ոչ թե օրենքի պատճառով. Հիմա, ասենք երկու մեքենա իրար հետ գնում ա, մեկը քո գործընկերներն են, կանգնացնում են, պառկացնում են ասֆալտին, նկարելով, ցույց տալով: ինչի համար: Այսօր հիմնական խնդիրը, որի մասին ես ուզում եմ ասել, որ պարոն վարչապետը այդ հակահեղափոխական մարդկանց իրա թիմում պետք է ման գա»:
Անդրադառնալով դիտարկմանը, որ իրենք հեղափոխությանը չեն միացել, ստիպված են եղել ԱԺ-ում քվեարկել Նիկոլ Փաշինյանի թեկնածության օգտին, Ծառուկյանն ասաց, որ հեղափոխության առաջին օրերին Նիկոլ Փաշինյանը քայլում էր շատ քիչ մարդկանցով, իսկ Երեւանում առաջին հանրահավաքին 1000-1200 մարդ էր մասնակցում. «Այդ ոնց եղավ, որ հաջորդ օրը ավելացավ: Իմ չափ լումա ո՞վ ունի: Ես հեղափոխությանը մեքենաներով ջրեր եմ ուղարկել:
Երբ Նիկոլ Փաշինյանին, Սասուն Միքայելյանին, Արարատ Միզոյանին ձերբակալել էին, ո՞վ առաջինը իրենց կողքին կանգնեց, հայտարարեց՝ ես իրենց կողքին եմ, իմ ժողովրդի հետ եմ: Այդ ժամանակ ոչ մեկը չէր պատկերացնում, անգամ Նիկոլի մտքով չէր անցնում, որ հնարավոր է Սերժ Սարգսյանը հրաժարական տա: Բայց ես կանգնել եմ կողքին եւ Սերժ Սարգսյանի հետ շատ սուր խոսակցություն է եղել: Հենց էդ պահին, հայտարարությունիցս հետո անմիջապես Սերժ Սարգսյանը զանգել է ու ասել՝ էս ինչ կատարվեց, մեջքից խփելով: Ես ասել եմ՝ եթե ես քո կողքին լինեի, գո գործընկերը լինեի, կոալիցիայում կլինեի: Ես ընդդիմադիր եմ եւ իմ ընդդիմադիր գործընկերների հետ եմ»,-ասաց Գագիկ Ծառուկյանը:
Նա նկատեց, որ վարչապետի ընտրվելու համար անհրաժեշտ ձայների մեկ երրորդը հատկացրել է, այնինչ կարող էր իր թեկնածությունը դնել. «Հիմա ասում են՝ մենակ, երեք հոգով... խի երեք հոգով հեղափոխություն է լինո՞ւմ: Արամ Սարգսյանը, Մարուքյանը, Մանեն ոչ մի բան չեն արել, ինքը մենակ հեղափոխություն արեց, մարդիկ էլ տենց եկա՞ն: Կամ խորհրդարանում պետք է լիներ ընտրություն, Ծառուկյանը իր 1/3-ը տվել է: Ես կարող էի իմ թեկնածությունը դնել, բայց ես ասել եմ՝ ժողովուրդ ջան, ձեր ուզածով է լինելու: Այսօր հեղափոխությունը առանց արյան չի լինում, «վլաստը» հենց այնպես չի տրվում, բայց ես ավելի լեգիտիմ եմ դարձրել:
Ոչ պաշտոն եմ ուզում, ոչ փող, ով եկավ՝ ստուգեց: Ես էսօր ի՞նչ վատ բան եմ արել իմ ժողովրդին»,-հավելեց ԲՀԿ նախագահը:
Նշենք, որ ԲՀԿ մամուլի խոսնակ Վանիկ Էլիզբարյանը ֆեյսբուքյան գրառում էր արել, որի համաձայն հոկտեմբերի 4-ին՝ ժամը 22:10-ին Գագիկ Ծառուկյանը պետք է տար կարեւոր հարցերի պատասխանները, բայց հաղորդումը հեռարձակվեց մոտ 2 ժամ ուշացումով:
Մինչ այդ ԲՀԿ նախագահը փակ քննարկում էր անցկացրել կուսակցության քաղաքական թիմի անդամների հետ:
