Ֆրանկֆուրտի մարզային բարձրագույն դատարանը հավանության է արժանացրել նախորդ դատարանի որոշումը՝ Արմին Մայվեսի վաղաժամ ազատ արձակվելու խնդրանքը մերժելու մասին։ Մայվեսը, ով ցմահ բանտարկության է դատապարտվել սպանության եւ կաննիբալիզմի համար, դիմել էր դատարան խափանման միջոցը պայմանական վաղաժամկետ արձակելով փոխելու խնդրանքով՝ տեղեկացնում է Reuters-ը։
2001թ․ Մայվեսը համացանցում հայտարարություն էր տվել, որ փնտրում է մի մարդու, ով կուզեր, որ իրեն ուտեին, ինչին արձագանքել էր Յուրգեն Բրանդեսը։ Նա Բեռլինի բնակիչ էր, աշխատում էր Siemens AG-ում՝ որպես ծրագրավորող։ Ծանոթների շրջանում նա հայտնի էր իր մազոխիստական հակումներով։
Սիրեկանների նկարահանած տեսանյութում երեւում է, թե ինչպես է Մայվեսը հերթական սեքսից հետո կտրում Բրանդեսի առնանդամը։ Այնուհետեւ նրանք փորձում են ուտել այն, բայց Բրանդեսը արնահոսությունից ուշաթափվում է։ Մայվեսը նրա կոկորդը կտրելուց առաջ համբուրում է շուրթերը։ Այնուհետեւ անդամահատում է նախկին սիրեցյալին, նրա մարմնի մասերը պահում սառցարանում եւ դրանցից տարբեր ճաշատեսակներ պատրաստում։
Մայվեսը ձերբակալվել էր 2002-ին՝ այն բանից հետո, երբ Ինսբրուքի քոլեջի ուսանողը զանգել էր ոստիկանություն՝ տեսնելով նոր զոհ փնտրելու նրա հաջորդ հայտարարությունը։
Սկզբում նրան դատապարտել էին 8,5 տարվա ազատազրկման՝ հաշվի առնելով, որ Բրանդեսն ինքնակամ էր մասնակցել այդ ակտին։ Այնուհետեւ, 2006-ին, վերանայելով դատավճիռը, որոշվել էր նրան ենթարկել ցմահ բանտարկության։ Դրան նպաստել էր նաեւ այն, որ հոգեբույժները հաստատել էին, թե Մայվեսի նախկին ցանկությունները չեն մարել․ եւ նա, հավանաբար, շարունակելու է մարդասպանությունն ու մարդակերությունը։
