Ներկայիս իշխանությունները բարձրագոչ գեղեցիկ կարգախոսներից, դեմագոգիայից ու սելֆիներից բացի՝ ոչինչ չեն արել: NEWS.am-ի հետ զրույցում այս մասին ասաց ԱԺ փոխխոսնակ, Հանրապետական կուսակցության մամուլի քարտուղար Էդուարդ Շարմազանովը:
Նրա խոսքով՝ Հայաստանի վարչապետ Նիկոլ Փաշինյանի հայտարարությունները աշխատավարձերի եւ թոշակների բարձրացման անհրաժեշտության մասին, որոնք նա անում էր ընդդիմադիր եղած ժամանակ, անհնար է այլ կերպ բնութագրել, քան սովորական դեմագոգիա եւ պոպուլիզմ: «Այն, ինչ նա ասում էր այդ ժամանակ, եւ այն, ինչ անում է հիմա՝ բացարձակապես տարբեր բաներ են: Միաժամանակ կազմակերպում է Ազգային ժողովի պաշարում»,- նշեց Շարմազանովը՝ Հայաստանի իրավիճակը համեմատելով 1993 թվականի հետ, երբ Ռուսաստանում ներքաղաքական դիմակայության եւ կառավարման գործող խորհրդային մոդելի բռնի վերացման հետեւանքով Մոսկվայի փողոցներում տեղի ունեցան զինված բախումներ եւ «Խորհուրդների տան»՝ խորհրդարանի շենքի գնդակոծում:
Հիշեցնենք, որ 2019 թվականի պետական բյուջեի նախագծով նախատեսվում է 4,9 տոկոս տնտեսական աճ՝ այն դեպքում, երբ 2017-ին այն անցել էր 7 տոկոսից: Չի սպասվում նաեւ աշխատավարձերի եւ թոշակների բարձրացում:
