Հայաստանի Հանրապետության կառավարության նպատակը էներգետիկայի եւ բնական պաշարների համակարգն առավել արդյունավետ դարձնելն է: Այս մասին ՀՀ էներգետիկ ենթակառուցվածքների եւ բնական պաշարների նախարարության աշխատակազմին նորանշանակ նախարարին ներկայացնելու ժամանակ նշեց ՀՀ վարչապետ Նիկոլ Փաշինյանը:
«Այս առումով կարող ենք արձանագրել, որ արդեն իսկ գործնական փուլ ենք մտել: Ինչո՞ւ հիմա, որովհետեւ վերջին ամիսների ընթացքում հիմնական խնդիրը եղել է այն, որ այս հարցերի վերաբերյալ ընդհանուր ըմբռնում ձեւավորվի մեր միջազգային գործընկերների մոտ, որպեսզի այս ոլորտում արդյունավետության բարձրացման հետ կապված աշխատանքների շուրջ ունենանք համաձայնություն, եւ այդ համաձայնությունը տեղի ունենա լիակատար ըմբռնման պայմաններում: Այս ընթացքում մենք կարողացել ենք նաեւ մի քանի նախագծերի շուրջ, որոնք որոշակիորեն վտանգված էին, համաձայնություններ ձեռք բերել, որոնց նպատակը եղել է բացառապես նախագծերը եւ համակարգերն արդյունավետ դարձնելը»,- ասաց նա:
ՀՀ վարչապետի խոսքով, լրջագույն խնդիրներ կան նաեւ ջրային ռեսուրսների կառավարման առումով թե էներգետիկայի, թե ոռոգման իմաստով՝ շեշտելով, որ այստեղ նույնպես լրջագույն մարտահրավեր են սպասվում, որոնք պետք է անպայման հաղթահարեն. «Էներգետիկայի եւ բնական պաշարների համակարգն այն ոլորտներից է, որտեղ իսկապես մեր երկիրը պետք է նոր մակարդակի հասնի»: