ՀՀԿ–ն շարունակում է քաղաքական իրավիճակը չհասկանալ։ Այս մասին այսօր՝ հոկտեմբերի 8-ին, լրագրողների հետ զրույցում ասաց ՀՀ վարչապետ Նիկոլ Փաշինյանը՝ անդրադառնալով այն դիտարկմանը, թե ՀՀԿ–ն չի բացառում, որ վարչապետի թեկնածու կառաջադրի։
«Նրանք մի կողմից ասում են, որ հանդուրժողականության մթնոլորտ են ակնկալում, բայց ամեն ինչ անում են, որ հանրությունը շարունակի իրենց չհանդուրժել եւ սա կարծում եմ՝ ճիշտ ճանապարհ չէ եւ ես կոչ եմ անում այդ ռեժիմից դուրս գալ, որովհետեւ չի կարելի անընդհատ տպավորություն ստեղծել, որ կա քաղաքական ուժ, որի նպատակն է խանգարել ժողովրդին, խանգարել պետությանը, երկրին առաջ ընթանալու։ Ես կարծում եմ, որ դա լավ դերակատարում չէ»,–ասաց նա։
Իսկ խոսելով հնարավոր սցենարի մասին, թե ինչ կլինի այն դեպքում եթե ՀՀԿ–ն վարչապետի թեկնածու առաջադրի Փաշինյանը նկատեց, այս դեպքում նրանք գործ կունենան պատմության աղբանոցի հետ, ինչն ավելի վտանգավոր է, քան «Սանիթեքի» աղբանոցը։
«Սանիթեքի աղբանոցներից» դուրս կգան, իսկ պատմության աղբանոցներից ելք չկա։ Եկեք ֆանտաստիկայի ժանրից չխոսենք, որովհետեւ ժողովուրդն ու մենք որեւէ մեկին նման հնարավորություն չենք տա»,– հավելեց նա՝ նշելով, որ դեռ չի որոշել, թե երբ հրաժարական կտա։
Փաշինյանը հավելեց, որ այս Ազգային ժողովը դե ֆակտո լուծարված է, մնում է այն դե յուրե լուծարել։