Հայաստանում խաղաղ ցույցերը մայրաքաղաք Երեւանում նոր հույս են արթնացրել եւ բիզնեսի ծաղկման հնարավորություն են ստեղծել: Այս մասին գրում է BBC Travel-ի թղթակից Լինդսի Գալովեյը:
Նրա խոսքով` Հայաստանն ընդամենը 3մլն բնակչությամբ փոքր երկիր է, որին, սակայն, հաջողվել է համաշխարհային ալիք բարձրացնել գարնանը տեղի ունեցած թավշյա հեղափոխության միջոցով: Ըստ հեղինակի, իշխանության խաղաղ փոխանցումն արդեն սկսել է վերափոխել մայրաքաղաք Երեւանը. բնակիչները նոր բիզնես են սկսել, նախկին բնակիչները վերադառնում են, եւ ավելի մեծ թվով այցելուներ են գալիս քաղաք:
Հեղինակը գրում է, որ Հռոմից ավելի վաղեմություն ունեցող Երեւանի 2800-րդ տարելիցին բնակիչները մտածում են քաղաքում արագ կատարվող փոփոխությունների եւ խոստումնալից ապագայի մասին:
Բեռլինից մեկ տարի առաջ Հայաստան եկած Անի Անդրին, որ պատրաստվում է գյուղական զբոսաշրջության բիզնես հիմնել, BBC-ին ասել է, որ հայերը շփվող են եւ միշտ ուրախ են նոր մարդկանց հյուրընկալել: Մարդկանց հարաբերությունները կայուն են, նրանք միշտ հետաքրքրվում են, թե ինչպես են դիմացինի գործերը, եւ ինչու վերջինս նախորդ օրը չի երեւացել:
Նշվում է, որ շատերի կարծիքով` հայկական մշակույթը ներառական է, նոր մարդկանց գալուստը սովորաբար դրական ընդունելության է արժանանում, եւ դրան նպաստում է մարդկանց ճկունությունը` նոր լեզուներ սովորելու նկատմամբ: Այստեղ հարուստ մշակույթը լավ է պահպանվել` հատկապես նախկին Սովետական միության երկրների հետ համեմատած, եւ պատճառը հիմնականում հնագույն պատմության ընթացքում տարբեր կայսրություններից կրած ազդեցությունն է:
Չնայած հայ ժողովրդի դարավոր դժվարություններին եւ ավանդապաշտությանը` բազմաթիվ Երեւանցիներ շարունակում են նոր գաղափարների եւ մտածելակերպի առջեւ բաց լինել:
Նշվում է, որ Երեւանում վերջերս Smart քաղաքի տարրեր են ներդրվել, որոնց շնորհիվ փորձ է արվում քաղաքում հաղորդակցումը բարելավել եւ կյանքի որակն առավել արդյունավետ դարձնել: Բարեփոխումների շարքում են համայնքային հաղորդակցման համակարգերի կառուցումը` սկսած քվեարկության հայտարարություններից մինչեւ համագործակցման վայրերի կառուցումը, որտեղ հնարավոր կլինի փոխանակվել նոր գաղափարներով:
