«Այգի» ռեստորանային համալիրից հրազենային վնասվածքով «Սբ. Գրիգոր Լուսավորիչ» բժշկական կենտրոն տեղափոխված Սարգիս Ավագյանի վիճակը ծանր է, դրական դինամիկայով: Այս մասին NEWS.am-ին հայտնեցին հիվանդանոցի վերակենդանացման բաժանմունքից։
Նշենք, որ Սարգիս Ավագյանին վիրահատել են, նա հրազենային վնասվածք էր ստացել։
Մեր տեղեկություններով՝ Սարգիս Ավագյանը «Այգի» ռեստորանային համալիրում սպանված նախկին պատգամավոր Կարո Կարապետյանի՝ «Յուվեցի Կարոյի» մտերիմներից է, նրա աջ ձեռքը։
Ավելի վաղ NEWS.am-ը հայտնել էր, որ հոկտեմբերի 6-ին, ժամը 22-ն անց 40-ի սահմաններում ոստիկանության Կենտրոնականի բաժին ահազանգ է ստացվել, որ Նորք Մարաշի Արմենակյան փողոցում գտնվող հացատներից մեկում կրակոցներ են։
Հիվանդանոցներ են տեղափոխվել նախկին պատգամավոր Կարո Կարապետյանը եւ եւս մեկ տղամարդ։
Դեպքի վայրում հայտնաբերվել են պարկուճներ եւ ատրճանակ։ Ձեռնարկված օպերատիվ-հետախուզական միջոցառումների եւ քննչական գործողությունների արդյունքում պարզվել է հանցագործությունը կատարելու մեջ կասկածվողի ինքնությունը։
Քննչական կոմիտեում դեպքի առթիվ հարուցվել է քրեական գործ՝ Ազգային ժողովի նախկին պատգամավոր Կարո Կարապետյանի սպանության դեպքի առթիվ։
Հոկտեմբերի 7-ին էլ հայտնաբերվել էր Կարո Կարապետյանի սպանությանմեջ կասկածվող նախկին պատգամավոր Հարություն Ղարագյոզյանի՝ «Կարամելի Հարութի» դին, ձեռքին ատրճանակ։
Դեպքի առթիվ քրեական գործ է հարուցվել ինքնասպանության հասցնելու հատկանիշներով։