ՄԱԿ փախստականների հարցերով գերագույն հանձնակատարի գրասենյակը մտահոգություն է հայտնել մի շարք երկրներից, այդ թվում՝ Սիրիայից փախստականներին եւ գաղթականներին օգնության ցուցաբերման միջոցների անբավարարությամբ, փոխանցում է ՏԱՍՍ-ը:

Երեքշաբթի Ժնեւում կայացած ճեպազրույցում գրասենյակի պաշտոնական ներկայացուցիչ Բաբար Բալոխը հայտարարել է, որ իրենց տները հարկադրաբար լքած սիրիացիներին աջակցելու համար ներկայումս ստացվել է 2018 թվականին անհրաժեշտ 1,968 մլրդ դոլարի միայն 35 տոկոսը:

Բալոխի խոսքով՝ միջոցներն անհրաժեշտ են, մասնավորապես, ձմռան նախաշեմին սիրիացիներին օգնելու համար, որոնք վերադարձել են բնակության նախկին վայրերը: Դրանից բացի, եթե ֆինանսավորումը չստացվի, ապա արդեն նոյեմբերին ստիպված կլինեն դադարեցնել Հորդանանում եւ Լիբանանում փախստականների ընտանիքներին կանխիկ գումարով տրամադրվող օգնության ծրագիրը. ընդհանուր առմամբ, նման օգնության կարիք ունի մոտ կես միլիոն փախստական՝ կացարանի վարձավճարի, բազային ծառայությունների եւ ամենօրյա կարիքների ապահովման համար:

Նա հայտնել է, որ Սիրիայից բացի, ֆինանսավորման հետ կապված առանձնապես բարդ իրավիճակ է ստեղծվել Բուրունդիում, Կոնգոյում, Աֆղանստանում, Հարավային Սուդանում եւ Սոմալիում: Աշխարհում 68,5 մլն հարկադիր տարագրվածների օգնության համար 2018 թվականին գրասենյակը 8,2 մլրդ դոլարի կարիք ունի: Գրասենյակը հույս ունի մինչեւ տարեվերջ ստանալ այդ գումարի 55 տոկոսը:

Բալոխը հիշեցրել է, որ անցյալ տարի ստացվել է անհրաժեշտ գումարի 56,6 տոկոսը, իսկ 2016-ին՝ 57 տոկոսը: