Մենք ուշադիր հետեւում ենք այն ամենին, ինչը կատարվում է Հայաստանում, եւ ես շատ ուրախ էի տեսնել, որ հոկտեմբերի 2-ին տեղի ունեցած իրադարձությունները խաղաղ մթնոլորտում անցան: Այս մասին հոկտեմբերի 9-ին հայտարարեց Հայաստանում ԱՄՆ-ի դեսպան Ռիչարդ Միլսը, ով ավարտում է իր առաքելությունը Հայաստանում:
«Հենց քաղաքական կուսակցությունները, կառավարությունը եւ հայ ժողովուրդը պետք է որոշեն ընտրությունների օրը: ԱՄՆ-ն եւ հայ ժողովրդի բոլոր բարեկամները նախ եւ առաջ ցանկանում են տեսնել ազատ եւ արդար ընտրություններ, վստահության արժանի գործընթաց, որը հնարավորություն կտա մասնակցելու բոլոր կուսակցություններին, անկախ նրանից նրանք խորհրդարանում ներկայացված են, թե ոչ», - ասաց դեսպանը:
Նրա խոսքով այս դեպքում տվյալ գործընթացը կվայելի հայ ժողովրդի վստահությունը եւ լոյալ ընդդիմությամբ եւ մեծամասնական կուսակցությամբ ժողովրդավարություն կձեւավորի:
«Ես ոգեշնչված եմ տարբեր կուսակցությունների հետ հանդիպումների արդյունքներով, քանի որ կողմերը պատրաստ են նստել բանակցային սեղանի շուրջ եւ փոխզիջումների գնալ», ասաց դեսպանը՝ հավելելով, որ փոխզիջումը լավագույն միջոցն է առաջ գնալու եւ կայունության հասնելու:
