ԵԱՀԿ Մինսկի խմբի համանախագահները, որոնք Ադրբեջան են ժամանել փետրվարի 10-ին տարածաշրջանային այցի շրջանակներում, հրաժարվել են պատասխանել լրագրողների հարցերին:
Ֆրանսիացի համանախագահ Բեռնար ֆասիեն ընդգծել է, որ Ադրբեջանի նախագահ Իլհամ Ալիեւի հետ հանդիպումից հետո հայտարարություն կանի բանակցությունների վերաբերյալ, հաղորդում է ANS TV-ն:
«Մենք գտնվում ենք առաքելության կեսում: Վաղը մենք կհանդիպենք արտգործնախարարի, նախագահի, եւ, եթե ստացվի, պաշտպանության նախարարի հետ: Մեր այցի նպատակն է ակտիվացնել հիմնարար սկզբունքների համաձայնեցմանը միտված ջանքերը: Մենք չենք կարող պատասխանել ձեր հարցերին, քանի որ բանակցությունների թեման երբեք չի բացահայտվում նախագահի հետ հանդիպումից առաջ»,- ասել է Ֆասիեն:
Նշենք, որ փետրվարի 10-ին Մինսկի խմբի համանախագահներ Ռոբերտ Բրադկեն (ԱՄՆ), Իգոր Պոպովը (Ռուսաստան) եւ Բեռնար Ֆասիեն (Ֆրանսիա) ժամանել են Ադրբեջան: ՄԻնչ այդ նրանք եղել են Երեւանում եւ հանդիպել Հայաստանի նախագահի, ԱԳ եւ պաշտպանության նախարարների հետ:
