Հայաստանի առաջատար բանկերից մեկը՝ Ինեկոբանկը, այսօր հայտարարեց բանկի խորհրդի նոր անդամի նշանակման մասին։ Պարոն Սուլխան Գվալիան նոր պաշտոնը զբաղեցրել է 2018 թվականի օգոստոսի 8-ին։
«Ինեկոբանկը ուրախ է ողջունել պարոն Գվալիային իր խորհրդի կազմում։ Համոզված եմ, որ բանկային համակարգի հսկայական փորձով, նորարարական մոտեցումներով եւ տեսլականով պարոն Գվալիան կունենա իր ուրույն ներդրումը Բանկի հետագա զարգացման գործընթացում»,- նշեց Ինեկոբանկի հիմնադիր եւ գլխավոր բաժնետեր Ավետիս Բալոյանը։
Ավելի քան տասը տարի պարոն Գվալիան եղել է վրացական TUBank-ի սեփականատերերից եւ փոխտնօրեններից մեկը: Իսկ վերջինիս ձեռքբերումից հետո Bank of Georgia-ի կողմից, նշանակվել է Ռիսկերի կառավարման եւ կորպորատիվ բանկինգի գծով փոխտնօրենի տեղակալ եւ զբաղեցրել է տվյալ պաշտոնը ավելի քան 11 տարի։ Իր պաշտոնավարման ընթացքում ակտիվորեն մասնակցել է Բանկի նախնական հրապարակային առաջարկի (IPO) գործընթացին՝ նպաստելով Բանկի զարգացմանն ու ճանաչելիության բարձրացմանը միջազգային հարթակներում։ Այսօր պարոն Գվալիան E-Space ՍՊԸ-ի համասեփականատեր եւ գլխավոր գործադիր տնօրենն է։ Ընկերությունը Վրաստանում միակն է, որը ուղղված է երկրում էլեկտրական տրանսպորտային միջոցների խթանմանը, նախագծում եւ մշակում է էլեկտրական մեքենաների լիցքավորման ենթակառուցվածքներ:
«Մենք շատ ուրախ ենք Ինեկոբանկի կողքին տեսնել մեր խորհրդի բոլոր անդամներին։ Նրանցից յուրաքանչյուրի փորձը, հմտություններն ու եռանդը նպաստում են Բանկի եւ իր ծառայությունների տեսանելիության բարձրացմանը ինչպես Հայաստանում, այնպես էլ Հայաստանի սահմանից դուրս»,- նշեց Ինեկոբանկի գործադիր տնօրեն պարոն Տիգրան Դավթյանը։
Սուլխան Գվալիան ստացել է իրավագիտության բակալավրի աստիճան Թբիլիսի պետական համալսարանից եւ Բանկային բակալավրի աստիճան Ֆրանկֆուրտի Բանկային ակադեմիայից։