Անցած 20 տարիների ընթացքում աշխարհում տեղի ունեցած բնական աղետները հանգեցրել են 1,3 միլիոն մարդու մահվան եւ ավելի քան 2,9 տրիլիոն դոլարի չափով նյութական վնասների ավելացման, նշվում է ՄԱԿ-ի Տարերային աղետների վտանգի նվազեցման վարչության զեկույցում, հաղորդում է «ՌԻԱ Նովոստին»:
Վարչության տվյալներով, 1998-ից մինչեւ 2017 թվականը բնական աղետների պատճառով համաշխարհային շուկաների ֆինանսական կորուստները աճել են 251 տոկոսով: Աղետների հետեւանքով տուժած երկրները կորցրել են 2 տրիլիոն 908 միլիարդ դոլար, որոնցից 77 տոկոսը կապված է եղանակի հետ:
Բնական աղետների պատճառով ամենից շատ կորցրել է ԱՄՆ-ն (944,8 մլրդ), Չինաստանը (492,2 միլիարդ), Ճապոնիան (376,3 միլիարդ) եւ Հնդկաստանը (79,5 միլիարդ): Եվրոպական երկրներում ջրհեղեղները, փոթորիկները եւ երկրաշարժերը ամեից շատ թանկ են արժեցել Ֆրանսիային (48,3 մլրդ), Գերմանիային (57,9 մլրդ) եւ Իտալիային (56,6 մլրդ):
20 տարվա ընթացքում աշխարհում տեղի է ունեցել 7255 տարերային աղետ, որոնց մեծ մասը կապված է եղանակի հետ:
Դրանք հիմնականում ջրհեղեղներ եւ փոթորիկներ են: Նշված ժամանակաշրջանում աղետների պատճառով մահացել է 1.3 մլն մարդ, նրանց կեսից ավելին երկրաշարժերի պատճառով:
Եւս 4.4 միլիարդ մարդ այսպես թե այնպես տուժել է՝ վիրավորվել է, կորցրել է տները, տեղահանվել կամ օգնության կարիք է ունեցել: