Մենք ավելի մոնոլիտ խորհրդարան չենք ունենալու, քան ունենք այսօր: Այս մասին, այսօր՝ հոկտեմբերի 10-ին, ԱԺ-ում լրագրողների հետ զրույցում նշեց ՀՀ վարչապետ Նիկոլ Փաշինյանը:
Նրա խոսքով, որեւէ կասկած չկա, որ Հայաստանում ժողովրդավարական արժեքներին որեւէ բան չի սպառնում. «Ընդ որում, դա մեր արժեքային համակարգն է, հավատամքն է: Դուք՝ լրագրողներդ, այսօր կարող եք փաստել, որ այսօր Հայաստանում մամուլն ազատ է այնքան, որքան չի եղել երրորդ հանրապետության պատմության ողջ ընթացքում: Ամեն օրվա ու ամեն տարվա ընթացքում մամուլը լինելու է ավելի ու ավելի ազատ: Հայաստանում օրենքի իշխանությունն ավելի ու ավելի ուժեղանալու է: հայաստանում լինելու է իրապես անկախ դատական համակարգ, ընտրությունների արդյունքները չեն կեղծվելու»,-ասաց վարչապետը:
Անդրադառնալով Ընտրական օրենսգրքի փոփոխությունների, Նիկոլ Փաշինյանն ասաց, որ ռեալ է, որ մինչեւ արտահերթ ընտրություններ այդ փոփոխություններն ընդունվեն, բայց եթե գործող խորհրդարանը դեմ լինի, գործող օրենսգրքով կլինեն ընտրությունները:
Հարցին, թե իր կարծիքով ՀՀ նախագահը կստորագրի՞ «ԱԺ կանոնակարգ» օրենքի աղմուկ հանած փոփոխությունները, Փաշինյանն պատասխանեց. «Հայտարարության մեջ նրա դիրքորոշումն արտահայտված է: Ես չեմ կարծում, թե նա որեւէ բան կանի... ինքն է ասել, հայտարարել, որ չեմ կարծում, որ որեւէ մեկը ժողովրդի դեմ որեւէ բան կանի»:
