Հոկտեմբերի 10-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց հայրենիքի պաշտպանության համար ռազմական գործողությունների հետեւանքով հաշմանդամություն ստացած երեք զինվորականների` ուղեկցությամբ ՀՀ ԶՈՒ հոգեւոր առաջնորդ Գերաշնորհ Տ. Վրթանես եպիսկոպոս Աբրահամյանի: Նրանք առաջիկա օրերին կմեկնեն Հնդկաստան` Մայր Աթոռ Սուրբ Էջմիածնի եւ Կալկաթայի Սուրբ Նազարեթ հայկական եկեղեցու վարչության նախաձեռնությամբ ու աջակցությամբ ստանալու անհրաժեշտ բուժումն ու վերջույթների պրոթեզավորումը: Սա երկու տարվա ընթացքում զինվորականների չորրորդ խումբն է, որ այս նպատակով մեկնում է Կալկաթա:
Ամենայն Հայոց Կաթողիկոսը, իր օրհնությունը բերելով զինվորականներին, նշեց, որ հպարտություն է տեսնել հայրենյաց պաշտպանների, ովքեր պատրաստ են իրենց կյանքն ընծայել հայրենիքի համար: «Ձեր կողմից դրսեւորած այդ քաջարի ոգին արդեն իսկ հերոսություն է մեզ համար», - ընդգծեց Նորին Սրբությունը` փաստելով, որ Մայր Աթոռը հետագայում եւս շարունակելու է այս առումով իր զորակցությունը բերել Հայոց բանակին:
Նորին Սրբությունը հույս հայտնեց, որ անհրաժեշտ այս բուժումը կօգնի զինվորականներին կազմակերպել իրենց հետագա կյանքը եւ ծառայությունը:
Իրենց հերթին զինվորականներն երախտագիտություն հայտնեցին Վեհափառ Հայրապետին հոգածու վերաբերմունքի, Եկեղեցու ազգապահպան առաքելության եւ բանակաշինության գործում ունեցած մեծ ներդրումի համար, պատասխանեցին նաեւ իրենց կյանքի եւ ծառայության վերաբերյալ Նորին Սրբության հարցումներին:
Հանդիպման ավարտին Ամենայն Հայոց Կաթողիկոսը «Պահպանիչ» աղոթքով օրհնեց զինվորականներին` մաղթելով, որ Ամենակալ Տերը պարգեւի նրանց ուժ եւ եռանդ նորանոր հաջողություններ արձանագրելու կյանքում եւ ապրելու հարատեւ խաղաղության մեջ: