Ռուսաստանի Քննչական կոմիտեն կրկնակի կուսումնասիրի 2017 թվականին Մորդովիայի գաղութում գործարար եւ բարեգործ Լեւոն Հայրապետյանի մահվան հանգամանքները, որն այնտեղ պատիժ էր կրում խարդախության համար: Նրա ազգականներին մերժել էին քրեական գործ հարուցել, սակայն պաշտպանությունը, համապատասխան որոշումը բողոքարկելով, հասել է դրա չեղարկմանը: Հիմա փաստաբանները հույս ունեն, որ քննությունը կպարզի պարոն Հայրապետյանի թունավորման հանգամանքները, ինչի մասին մահվան նախօրեին հայտնել էր եղբորը, հայտնում է «Կոմերսանտը»:
«Սոբեսեդնիկ» հրատարակչական տան տնօրենների խորհրդի նախագահ, մեկենաս եւ բարեգործ Լեւոն Հայրապետյանը Մորդովիայում №13 գաղութում խարդախության համար 4 տարվա պատիժ էր կրում: Ինչպես հաստատված է համարվել քննության եւ դատաքննության ժամանակ, 2010 թվականին նա սպանությունների եւ ահաբեկչական հարձակման կազմակերպման համար մեղադրվող Բաշկիրիայից նախկին սենատոր Իգոր Իզմեստեւի մորը խոստացել է որդու համար մեղմ դատավճռի հասնել: Սակայն կնոջից 700 հազար դոլար ստանալով՝ դա չի արել, իսկ նախկին սենատորին ուղարկել են հատուկ գաղութ ցմահ պատժաժամկետը կրելու: Զայրացած մայրը «Սոբեսեդնիկի» համահիմնադրին մեղադրել է խարդախության մեջ, որից հետո Լեւոն Հայրապետյանի դեմ քրեական գործ է հարուցվել Քրեական օրենսգրքի համապատասխան՝ 159-րդ հոդվածի 4-րդ կետով, իսկ 2016 թվականի ապրիլին նրա նկատմամբ դատավճիռ է կայացվել:
Լեւոն Հայրապետյանը գաղութ է ժամանել քրոնիկական հիվանդությունների մի ամբողջ փնջով, այդ թվում՝ օնկոլոգիական: Բայց քանի որ գործարարը բավականին ապահովված մարդ էր, նրա ազգականները մեծ գումարներ են ծախսել արդյունավետ արտասահմանյան դեղերի համար, որոնք դատապարտյալի առողջությունը պահպանել են: Նա այդ ժամանակ դատարան էր դիմել՝ փորձելով հասնել գաղութից ազատվելուն, քանի որ օնկոլոգիան կառավարության կողմից հաստատված այն հիվանդությունների ցանկում էր, որոնք անհամատեղելի են բանտային ռեժիմին: Առաջին ատյանի դատարանը հայցը մերժել էր, իսկ 2017 թվականի հոկտեմբերի 18-ին Մորդովիայի Գերագույն դատարանում նշանակված էր գործի վերանայումը: Նիստին հրավիրվել էին փորձագետներ, որոնք, ինչպես նշում է փաստաբան Կարեն Ներսեսյանը, պատրաստ էին վկայելու դատապարտված ձեռնարկատիրոջ հիվանդությունների ծանրությունը: Պարոն Ներսեսյանի խոսքով՝ նիստից մեկ օր առաջ՝ հոկտեմբերի 16-ին, Լեւոն Հայրապետյանի ինչ-որ ծանոթներ՝ Մոսկվայից եկած երկու տղամարդ նրան գաղութի աշխատակիցների միջոցով դեղեր են փոխանցել: Հոկտեմբերի 17-ին դրանք ընդունելով՝ պարոն Հայրապետյանը շուտով մահացել է գաղութի սանմասում: Նրա բժիշկները գրանցել են սրտային անբավարարության պատճառով մահը: Պարոն Հայրապետյանի ազգականներին այս ախտորոշումը հավատ չի ընծայել:
«Մահվան նախօրերին Հայրապետյանը զանգել էր իր եղբորը եւ ընկերոջը՝ Պարգեւ արքեպիսկոպոսին, որը ղեկավարում է Լեռնային Ղարաբաղի Հայ առաքելաական եկեղեցու թեմը, հայտնելով որ իրեն թունավորել են»,- պատմել է Ներսեսյանը:
Մահացածի եղբայրը չի շտապել պատմել սպանության մասին: «Սկզբում նա նամակներ է գրել գաղութ՝ փորձելով պարզել հարազատի մահվան իսկական պատճառը, բայց պաշտոնական պատասխաններ է ստացել,- պարզաբանել է փաստաբանը,- իսկ հետո իմացել է, որ գաղութում մահացածի հյուսվածքների նմուշները պահվում են միայն մեկ տարի, իսկ հետո օգտագործվում են: Վախենալով, որ այդպես կվարվեն նաեւ իր եղբայր Լեւոն Հայրապետյանի կենսանյութի նմուշների հետ, գործարարի եղբայրը մայիսի վերջին դիմել է Մորդովիայի Հանրապետության Քննչական վարչություն, պահանջելով քրեական գործ հարուցել Լեւոն Հայրապետյանի մահվան փաստով»: Սակայն 2018-ի հունիսին նրան մերժել են:
Այն ժամանակ էլ հարազատները դիմել են փաստաբան Կարեն Ներսեսյանի օգնությանը, որը Մորդովիայի դատախազությունում բողոքարկել է ՔԿ-ի մերժումը: Բացի Լեւոն Հայրապետյանի եղբոր գրավոր դիմումից, որը հաստատել էր թունավորման մասին, փաստաբանը, վերլուծելով գործարարի եւ նրա ազգականների հարաբերությունները, ենթադրել է, որ նրանք կարող էին շահագրգռված լինել դատապարտյալի մահվան մեջ:
«Հայրապետյանի ժառանգության ընդհանուր գումարը առնվազն 100 միլիոն դոլար էր՝ ներառյալ շարժական եւ անշարժ գույքը», - բացատրել է Ներսեսյանը: «Եվ եթե Լեւոնը ազատ արձակվեր, ապա ընտանիքում լարված հարաբերությունների պատճառով նա կարող էր ընտանիքի որոշ անդամներին զրկել ժառանգությունից, ինչը նրանց կտրականապես ձեռնտու չէր»:
Այս ամենի մասին պարոն Ներսեսյանը մանրամասն գրել է Զուբովո-Պոլյանսկայա դատախազությանն ուղղված դիմումում: Այնտեղ, ուսումնասիրելով փաստաբանի գրածը, չեղարկել են Մորդովիայի ՔԿ-ի որոշումը, որն արդեն Ներսեսյանի դիմումի հիման վրա փաստերի լրացուցիչ ստուգում էր նշանակել:
