Ֆլորիդայի իշխանությունները խորհուրդ են տվել առնվազն 500 հազար բնակիչների թողնել իրենց տները «Մայքլ» փոթորկի պատճառով, որը շարժվում է Մեքսիկական ծոցից այդ ամերիկյան նահանգի ուղղությամբ, հաղորդում է ՏԱՍՍ-ը՝ վկայակոչելով Reuters-ին:
Վերջինիս հաղորդմամբ այժմ փոթորիկը գտնվում է Ապալաչիկոլա քաղաքից 145 կմ հարավ-արեւմուտք եւ 5,5 մ/վ արագությամբ շարժվում է դեպի հյուսիս: Էպիկենտրոնում քամու արագությունը 63.8 մ /վ է:
Երեքշաբթի Մեքսիկական ծոցի ափամերձ ընկերությունները որոշել են վերահաս փոթորիկի պատճառով կրճատել նավթի եւ գազի արդյունահանումը համապատասխանաբար 40 եւ 28 տոկոսով:
Չորեքշաբթի «Մայքլ» փոթորիկը Սաֆիր-Սիմփսոնի սանդղակով հինգ հնարավորից սաստակցել էր մինչեւ չորրորդ աստիճան: ԱՄՆ-ի Փոթորիկների դիտորդական կենտրոնը նախազգուշացրել էր, որ փոթորիկը կարող է ուժեղ քամիներ, բարձր ալիքներ եւ Մեքսիկական ծոցի հյուսիս-արեւելյան ափին տեղումներ առաջացնել:
ԱՄՆ նախագահ Դոնալդ Թրամփը փոթորկի պատճառով հանձնարարել էր Ֆլորիդա նահանգին դաշնային օգնություն տրամադրել, իսկ հարեւան Ալաբամա նահանգի ղեկավար Կեյ Այվին հայտարարել էր արտակարգ դրության ներդրման մասին:
