Յորքի արքայադուստր Եվգենիա Վիկտորիա Ելենան՝ Եղիսաբեթ II թագուհու թվով վեցերորդ թոռնուհին եւ բրիտանական գահին հավակնորդների շարքում իններորդը, ամուսնացել է գինեվաճառ Ջեք Բրուքսբենկի հետ: Նրանց հարսանիքը կայացել է Վինձորի ամրոցի նույն Սուրբ Գեորգի եկեղեցում, որտեղ մայիսի 19-ին ամուսնացել էին արքայազն Հարին եւ Մեգան Մարքլը, գրում է ՌԲԿ-ն:
Արքայադուստր Եվգենիան ծնվել է 1990-ին, նա Եղիսաբեթ II թագուհու երկրորդ որդու՝ Յորքի դուքս Էնդրյուի կրտսեր դուստրն է:
Ջեք Բրուքսբենկը 32 տարեկան է, նա համարվում է բարոնետական տոհմի ժառանգը եւ Եվգենիայի հեռու ազգականը (նրա մայրը՝ Յորքի դքսուհին այն կնոջ ծոռնուհին է, որը Ջեքի պապու պապի դուստրն է եղել):
Արքայադստեր հետ Բրուքսբենկը ծանոթացալ է 7 տարի առաջ Շվեյցարիայի լեռնադահուկային առողջարանում: Այդ ժամանակ Բրուքսբենկը, որը որոշել էր ռեստորանահյուրանոցային բիզնեսում կարիերա անել, դեռ մատուցող էր աշխատում, հետագա տարիներին նա աստիճանաբար բարձրացել է կարիերայի աստիճանով ի վերջո դառնալով լոնդոնյան հեղինակավոր Mahiki ակումբի մենեջեր, որտեղ մշատական հաճախորդներ էին համարվում արքայազն Հարին եւ Ուիլյամը:
