Ոնց կարող ա չմասնակցեմ, ինչի՞ համար պիտի չմասնակցեմ ընտրություններին: Այս մասին, այսօր՝ հոկտեմբերի 13-ին, լրագրողների հետ զրույցում նշեց ԲՀԿ առաջնորդ Գագիկ Ծառուկյանը՝ պատասխանելով հարցին, թե արդյոք կմասնակցե՞ն ԱԺ արտահեթ ընտրություններին, եթե դրանք տեղի ունեն հին ընտրական օրենսգրքով:
Դիտարկմանը, որ հաշվի առնելով Երեւանի ավագանու ընտրությունների արդյունքները, ԲՀԿ-ն կարող է ԱԺ-ում փոքր խմբակցություն ունենա կամ ընդհանրապես չհայտնվի ԱԺ-ում, Ծառուկյանն արձագանքեց.
«Քաղաքապետի ընտրությանը դուք տեսաք, որ ոչ թե քաղաքապետի ընտրություն էր, որ եթե դու քաղաքում ես բնակվում, Ծառուկյանի կատարած գործունեությունը, հրավերքները քաղաքապետներին, ներդրողներին, որոնք պատրաստ էին աջակցելու, անելու, կառուցելու թե բնակարանները, թե աղբը, թե տրանսպորտը, վթարային շենքերը ու ասել էի, որ մենք հաղթելուց անմիջապես անելու ենք:
Ես երեւանցիների համար ուզեցել եմ, որ լավ լինի, բայց եղավ ոչ թե քաղաքապետի ընտրություն, այլ հեղափոխական քայլեր, որը անհրաժեշտ էր: Մենք էլ շնորհավորեցինք, նորմալ ընդունեցինք: Մեր երեւանցիների ցավն էլ տանեմ, հաղթողներին էլ: Այսօր ով ինչի համար պատասխանատվություն է վերցրել, դա պետք է անի: Ծառուկյանը ոչ քաղաքականությամբ ապրում է, ոչ քաղաքականության հաշվին ապրի: Ես իմ ժողովրդի քայլից հետ չեմ գնում: Մենակ ասելով չի, մարդը լիարժեք պետք է կարողանա այդ պայմանները, հնարավորությունները ստեղծի: Ես Հարվարդ չեմ ավարտել, բայց ինքստինքյան իմ փորձը, պրակտիկորեն, ոչ թե թեորիապես, ինչ է անհրաժեշտ սովորական մարդուն»:
Հարցին, թե ինչպես եղավ, որ «Ծառուկյան» խմբակցության պատգամավորները դեմ էին ԱԺ արտահերթ ընտրությունները դեկտեմբերին տեղի ունենան, բայց հետո ինքը կողմ արտահայտվեց եւ անգամ հուշագիր ստորագրեց վարչապետի հետ, ԲՀԿ առաջնորդն պատասխանեց. «Մեր պատգամավորները դեմ էին, բայց դեմ լինելը կար կառավարության ծրագրով ընդունված, թե ինչ պետք է լիներ, բայց համապատասխան հարցը բարձրացրին, որ ժողովուրդն է ուզում, ժողովրդի ցավն էլ տանեմ: Ինքն է ապրելու այս երկրում: Եթե ինքն ուզում է, մենք էլ ենք ուզում: Այդպիսի խնդիր չկա, որ մենք կառչենք: Հիմա եթե դրեցինք դեկտեմբերին, ցուրտ ա, ձմեռ ա, քարոզարշավ ա: Եթե այսօր անհրաժեշտ է ժողովրդին, մենք կողմ ենք»: