Գերմանական առեւտրային բանկերը Եվրոպական կենտրոնական բանկի ղեկավարությանը կոչ են արել առաջիկայում փոխել տոկոսադրույքների քաղաքականությունը, փոխանցում է DW-ն:
«Մենք կարող ենք ԵԿԲ-ին միայն խնդրել՝ շուկայից վերացրեք բացասական տոկոսները եւ հնարավորինս արագ»,- հոկտեմբերի 13-ին հայտարարել է Գերմանական բանկերի դաշնային միավորման (BdB) նախագահ Հանս-Վալտեր Պետերսը Բալիում ընթացող Արժույթի միջազգային հիմնադրամի ամենաամյա նիստի ժամանակ:
Բացասական տոկոսների երկար ժամանակահատվածը «իսկական խնդիրներ է ստեղծում», նշել է նա: Նրա խոսքով՝ եվրոպական բանկերը ստիպված են ամեն տարի ԵԿԲ-ին շուրջ 7,5 մլրդ եվրո տուգանքային տոկոսներ վճարել, մինչդեռ ԱՄՆ Դաշնային պահուստային համակարգը նման վճարումներ չի պահանջում, իսկ 2017-ին նույնիսկ բանկերին մոտ 26 մլրդ դոլար է վճարել որպես տոկոս: 2018-ին նման վճարումների ծավալը կարող է կազմել 45 մլրդ դոլար: Նման իրավիճակում եվրոպական բանկերը տանուլ են տալիս, շեշտել է Պետերսը:
Ինչպես նախկինում, եվրոպական բանկերը Եվրոպական ԿԲ-ից զրոյական տոկոսադրույքով են փող ստանում, բայց նրանք, միաժամանակ, ստիպված են հետեւել, որ կանխիկ գումարի մեծ պաշարներ չստեղծվեն, որոնք, մասնավորապես, առաջանում են հաճախորդների ավանդների հաշվին, նշել է BdB նախագահը: Ավելցուկային ազատ միջոցների համար, որոնք բանկերը տեղադրում են ԵԿԲ-ում, նրանք ստիպված են 0,4 տոկոսի տուգանք վճարել: Ընդ որում՝ ավելի մեծ թվով բանկեր են ԵԿԲ տուգանքային տոկոսները փոխանցում իրենց հաճախորդների վրա:
Որոշումներ ընդունելիս Եվրոպական կենտրոնական բանկը պարտավոր չէ հաշվի առնել Իտալիայի մեծ պարտքը, որը ստիպված է նոր վարկերի համար զգալիորեն ավելի բարձր տոկոսներ վճարել, քան Գերմանիան:
