Հետախուզական գլխավոր վարչության նախկին գնդապետ Սերգեյ Սկրիպալը 2017թ․ ամռանը մեկ շաբաթ Շվեյցարիայում է անցկացրել՝ տեղեկացնում է The Telegraph-ը։
The Telegraph-ը գրում է, որ BBC-ի լրագրող Մարկ Ուրբանի գրքից որոշ տեղեկությունների հիման վրա (թեեւ հեղինակը չի գրում, թե Սկրիպալն իր հետ ինչի մասին է խոսել) կարելի է եզրակացնել, որ խորհրդային նախկին խուզարկուն կարող էր պատմել Համաշխարհային հակադոպինգային գործակալության տեղեկատվական համակարգերի վրա ռուսական հաքերների ենթադրյալ գրոհի մասին։
Հոկտեմբերի սկզբին Վաշինգտոնը 7 ռուսաստանցիների մեղադրել էր ամբողջ աշխարհում կիբեռգրոհների մեջ։ Ըստ ԱՄՆ արդարադատության նախարարության՝ բոլոր կասկածյալները ռուսական բանակի սպաներ են։
Մարկ Ուրբանի «Սկրիպալի գործը․ ռուսական լրտեսի կյանքն ու գրեթե մահը» գիրքը ԱՄՆ-ում լույս է տեսել հոկտեմբերի 2-ին։ Լրագրողը գրում է, որ Սկրիպալը Ղրիմը Ռուսաստանին վերադարձնելու կողմնակից էր, հերքում էր ռուսական զորքերի ներկայությունը Դոնբասում եւ «Առաջին ալիք» էր դիտում։
Հիշեցնենք, որ մարտին Սերգեյ Սկրիպալն ու նրա դուստր Յուլյան բրիտանական Սոլսբերի քաղաքի այգում հայտնաբերվել էին անգիտակից վիճակում։ Բրիտանիան նրանց թունավորման մեջ մեղադրում է Ռուսաստանին, իսկ վերջինս ամեն ինչ հերքում է։