Հոկտեմբերի 15-ին Հայաստանի Ամերիկայն համալսարանում տեղի է ունեցել Սննդի գիտության եւ տեխնոլոգիաների սեւծովյան ասոցիացիայի համաժողովը, որին մասնակցել է նաեւ ՀՀ ԿԵ սննդամթերքի անվտագնության տեսչական մարմնի ղեկավար Գեորգի Ավետիսյանը:
ՍԱՊԾ-ից NEWS.am-ին հայտնում են, որ հանդես գալով բացման խոսքով՝ տեսչական մարմնի ղեկավարը մասնավորապես նշել է, թե պատկերացնել սննդամթերքի անվտանգության ապահովումը առանց ռիսկերի գնահատման եւ կառավարման անհնարին եւ անշնորհակալ գործ է: «Տեսչական մարմինը առավել նպատակային եւ հասցեական վերահսկողություն իրականացնելու համար պետք է հնարավորություն ունենա կիրառելու ռիսկերի գնահատման, կառավարման եւ հաղորդակցության արդիական մեթոդներն ու անհրաժեշտ համակարգերի գործիքակազմերը»,- ասել է Գեորգի Ավետիսյանը:
Սննդի գիտության եւ տեխնոլոգիաների սեւծովյան ասոցացիան (B-FoST) սեւծովյան տարածաշրջանի երկրներից անհատ գիտնականների եւ գիտական կազմակերպությունների չահույթ չհետապնդող ցանց է, որն աշխատում է հիմնային եւ կիրառական սննդի գիտության, հետազոտության եւ զարգացման, նորարարական տեխնոլոգիաների, սննդի բաղադրիչների, սնման եւ առողջապահության մեջ նոր միտումների, սննդամթերքի տեխնոլոգիայի եւ ինժեներիայի, սննդի անվտանգության եւ որակի, սննդի եւ կերերի շուկայի ոլորտներում։
Համաժողովն ընձեռում է գերազանց եւ եզակի հնարավորություն սննդագետներին, հետազոտողներին, տեխնոլոգներին, արտադրողներին եւ սննդաբաններին երիտասարդ գիտնականներին եւ ուսանողներին ներկայացնելու իրենց աշխատանքների արդյունքներն ու գյուտերը, ինչպես նաեւ փոխանակելու տեղեկատվություն նոր գործընթացների վերաբերյալ։
Այս միջոցառման շրջանակներում կկազմակերպվի 2 դասընթաց՝ Վտանգի վերլուծության եւ կրիտիկական կետերի վերահսկման (HACCP) համակարգի յոթ սկզբունքների եւ սննդամթերքի արտադրությունում HACCP-ի ներդրման, ինչպես նաեւ սարքերի ու սարքավորումների հիգիենիկ նախագծման վերաբերյալ:
