Հայկական մեղրը մրցունակ է Եվրոպական միության շուկայում։ Այսպիսի կարծիք NEWS.am-ի թղթակցի հետ զրույցում հայտնեց ՀՀ ԳՆ ՍԱՊԾ սննդամթերքի անվտանգության և որակի հսկողության տեսչության պետ Վահե Դանիելյանը։
Նրա խոսքերով՝ տեղական մեղրի մոնիթորինգը վկայում է նրա լավ որակի եւ եվրոպական ստանդարտներին համապատասխանելու մասին։ «Հայկական մեղրը պահանջարկ ունի աշխարհի տարբեր երկրներում։ Այսօրվա դրությամբ մենք աշխատում ենք տեղական մեղրը նաեւ չինական շուկա արտահանելու ուղղությամբ։ Այդ աշխատանքներն արդեն վերջնական փուլում են, եւ հուսով ենք, որ մինչեւ 2019թ․ կեսերը համապատասխան համաձայնագիր կկնքվի»,- տեղեկացրեց Դանիելյանը։
Իր հերթին «Մուլտի Ագրո» գիտաարտադրական կենտրոնի գլխավոր տնօրեն Ռոզա Ծառուկյանը տեղեկացրեց, որ վերջին տարիներին Հայաստանում մեղվաբուծությունը բարձր տեմպերով է զարգանում։ Այսպես, եթե 2002թ․ Հայաստանում 77 հազար մեղվաընտանիք կար, ապա այսօր դրանց թիվն ավելի քան 650 հազար է։ Ընդ որում, նշվեց, որ հանրապետությունում գնալով ավելանում է մեղվաբուծությամբ զբաղվող երիտասարդների թիվը։
Ծառուկյանը պատմեց, որ հայկական մեղրը մեծ պահանջարկ ունի արտասահմանում։ Ընդ որում, նրա խոսքերով՝ Հայաստանը դրա արտահանման ծավալներն ավելացնելու բոլոր հնարավորություններն ունի։