Ղարաբաղյան հակամարտության կողմերին ռուսական զենքի մատակարարումների հարցը պետք է ուղղվի ռուս, այլ ոչ ամերիկացի դիվանագետներին: Այս մասին հոկտեմբերի 16-ին Երեւանում կայացած մամուլի ասուլիսի ժամանակ ասաց ԱՄՆ պետքարտուղի Եվրոպայի եւ Եվրասիայի հարցերով փոխօգնական Ջորջ Քենթը:
Ի պատասխան տարածաշրջանում սպառազինությունների մրցավազքի եւ երկու կողմերին ռուսական զենքի մատակարարումների մասին հարցին՝ նա համաձայնվեց, որ դա կարող է հակամարտության վրա հումանիտար ազդեցություն ունենալ, եւ սա այն է, «ինչի մասին բոլորս՝ լինենք լրագրողներ, քաղաքացիներ թե դիվանագետներ, պետք է հիշենք»:
«Գիտեմ, որ հակամարտության հետեւանքով անմիջականորեն տուժել են շատ հայեր ու ադրբեջանցիներ, կորցրել են ամեն ինչ եւ կյանքը նորից սկսել»,- ասաց Քենթը՝ պատասխանելով հարցին, թե ինչու սպառազինության մրցավազքի մասին հարցը չի բարձրացվում ՄԱԿ Գլխավոր ասամբլեայի նիստերում:
Նա համաձայնվեց, որ հումանիտար խնդիրները բոլորը միասին պետք է լուծեն եւ փորձեն լուծումներ գտնել, որոնք մարդկանց չպետք է թողնեն վախի մեջ:
Ինչ վերաբերում է հարցին՝ վարչապետ Նիկոլ Փաշինյանի հետ հանդիպման ժամանակ անդրադարձ եղե՞լ է բանակցություններին Լեռնային Ղարաբաղի մասնակցությանը, նա հայտարարեց, որ իրենք շատ թեմաներ են քննարկել՝ ներառյալ այն, թե բանակցություններն ինչպես առաջ մղեն: «Մեր նպատակն է կողմերի միջեւ զրույցին նպաստելը»,- հավելեց Քենթը: