Վարչապետի հրաժարականից հետո ԱԺ-ում վարչապետի ընտրության առաջին շրջափուլում Նիկոլ Փաշինյանի վարչապետի թեկնածու առաջադրվելը իրավական հարց է, քաղաքական չէ: Այս մասին, այսօր՝ հոկտեմբերի 17-ին, «Ազատության» հարցին ի պատասխան նշել է վարչապետի պաշտոնակատար Նիկոլ Փաշինյանը:
«Դա ոչ թե քաղաքական, այլ իրավական հարց է, իրավաբանների բանավեճեր են տեղի ունենում: Երեկ երկրորդ կեսի դրությամբ ծանրակշիռ էր այն կարծիքը, որ նման մեկնաբանությունը ճիշտ չէ կապված առաջադրման անհրաժեշտության հետ»,-ասաց նա:
Դիտարկմանը, որ ինքն այդ մասին բարձրաձայնեց «Ելք» խմբակցության պատգամավորների հետ հանդիպման ժամանակ, Նիկոլ Փաշինյանն ասաց. «Ես չցանկացա, որ որեւէ նրբերանգ անտեսվի, ես բարձրաձայնեցի, որ այն իրավաբանները, որոնք ներգրավված չեն այդ բանավեճում, իրենք էլ ներգրավվեն, որ ամեն ինչ ճշգրիտ լինի: Երեկ երեկոյան ներկա իրավաբանների մեծ մասը կարծում էր, որ դրա անհրաժեշտությունը չկա:
Չնայած այդ բանավեճերի արդյունքում որոշումը քաղաքական շրջանակում պետք է կատարվի, բայց հարցը քաղաքական ենթատեքստ չունի»,-ասաց նա:
Ավելի վաղ NEWS.am-ը հայտնել էր, որ հոկտեմբերի 16-ին, «Ելք» խմբակցության պատգամավորների հետ հանդիպման ժամանակ Նիկոլ Փաշինյանը հայտարարել էր. «Այս անցումային շրջանում մենք պետք է որոշակի համաձայնություններ արձանագրենք, որպեսզի արդյունավետ քայլերով գնանք առաջ եւ հասնենք արտահերթ խորհրդարանական ընտրությունների: Այս ընթացքում նաեւ որոշակի իրավական գործընթացներ ապահովելու համար անհրաժեշտ կլինի, որ «Ելք» խմբակցությունն ակտիվ դերակատարում ունենա առաջիկայում՝ այս 14 օրվա ընթացքում: Մեծ է հավանականությունը, իրավաբանների խորհուրդն է նաեւ այդպիսին, որ այս 14 օրվա ընթացքում առնվազն առաջին շրջափուլում որպես վարչապետի թեկնածու առաջադրվեմ, որպեսզի պրոցեսն ամբողջությամբ համապատասխանի օրենքի տառին եւ ոգուն, իհարկե չընտրվելու կանխավարկածով: Եվ այդ հարցով նույնպես կուզենայի մենք քննարկենք, նախապես պայմանավորվածություններ ձեռք բերենք, եւ իհարկե ընթացիկ քաղաքական իրավիճակը քննարկենք»:
