«Ծառուկյան» խմբակցությունը լքած անձանց էջը նույն խմբակցության պատգամավոր Նաիրա Զոհրաբյանի համար փակ է, նա հրաժարվեց նրանց անդրադառնալ։
Նա այսօր՝ հոկտեմբերի 17-ին, ԱԺ-ում լրագրողների հետ զրույցում շեշտեց՝ դա իրենց բացարձակ իրավունքն է։ «Ես միշտ ասել եմ, որ մարդիկ, ովքեր հեռանում են կուսակցությունից, այս մարդկանց էջը, որպես մարդ եւ որպես քաղաքական գործիչ, ինձ համար փակ է, ես իրենց չեմ անդրադառնալու: Իրենց գործն է, ընդամենը ուզում եմ հիշեցնել մեր նախկին կուսակից Արագած Ախոյանի խոսքը, երբ վերջին խորհրդարանական ընտրություններում նա մասնակցեց ՀՀԿ ցանկով, եւ տապալումից հետո այնքան պարկեշտություն ունեցավ, որ հայտարարեց՝ մեր ժողովուրդը ճամբարափոխներին չի սիրում։ Դա բացառապես Վահան Կարապետյանի եւ Լյովա Խաչատրյանի գործն է»,-ասաց նա:
Դիտարկմանը, որ նախորդ ընտրությունների ժամանակ ԲՀԿ ցուցակներում եղել են մարդիկ, որոնք բիզնեսով են զբաղվել, գործարար են եղել, սակայն վարչապետը հայտարարել է, որ գործարարները պետք է հեռու մնան քաղաքականությունից, ի՞նչ սկզբունքով է կազմվելու ԲՀԿ ցուցակն այս անգամ, պատգամավորն ասաց. «Մեր ցուցակը կազմելու ենք մեր սկզբունքով, այն սկզբունքով, որը կորոշի ԲՀԿ–ն»։
Լրագրողները հետաքրքրվեցին՝ արտահերթ ընտրություններին դաշինքով է գնալո՞ւ ԲՀԿ–ն, թե՞ միայնակ, նա նշեց, որ այդ հարցով քննարկումներ դեռ չեն ունեցել. «Առաջիկա օրերին կլինի, վստահ եղեք, որ մեր բոլոր որոշումները լինելու են բաց եւ հրապարակային»։
Նշենք, որ ԲՀԿ-ից հեռացել են նախկին պատգամավորներ Լյովա Խաչատրյանն ու Վահան կարապետյանը (Չերրիի Վահան):