Այս օրինագծով առաջարկվում է արգելել որոշ գետերի եւ գետաբերանների վրա փոքր ՀԷԿ-երի կառուցումը: Այս մասին հեկտեմբերի 17-ին ԱԺ տարածքային կառավարման, տեղական ինքնակառավարման, գյուղատնտեսության եւ շրջակա միջավայրի հարցերի մշտական հանձնաժողովի նիստում՝ «Հայաստանի Հանրապետության Ջրային օրենսգրքում փոփոխություններ եւ լրացումներ կատարելու մասին» օրինագծի քննարկման ժամանակ ասաց բնապահպանության նախարարի պաշտոնակատար Էրիկ Գրիգորյանը:
Դրանից զատ, նա հավելեց, որ անհրաժեշտ է ՀԷԿ-երի կառուցումն արգելել այն գետերի վրա, որտեղ էնդեմիկ ձկնատեսակներ են բնակվում: «Խոսքը հիմնականում Սեւանա լճի մասին է»,- պարզաբանեց Գրիգորյանը:
«Ելք» խմբակցության ղեկավար Լենա Նազարյանը հետաքրքրվեց, թե ինչ պետք է լինեն այն ՀԷԿ-երը, որոնք արդեն կառուցվել են եւ բնապահպանական վտանգ են ներկայացնում: Բնապահպանության նախարարի պաշտոնակատարը արձանագրեց, որ դրանք արդեն կառուցվել են, եւ որ կա շինարարության թույլտվությունը հետ կանչելու հնարավորություն, բայց այդ դեպքում ֆինանսական փոխհատուցում կպահանջվի: «Կառավարության առաջարկը չի վերաբերում նախկինում կառուցված ՀԷԿ-երին, եւ մենք միայն կարող ենք դիմել դրանց սեփականատերերին՝ իրենց գործունեությունը վերանայելու առաջարկով»,- պարզաբանեց պաշտոնյան:
Այս օրինագիծը ստացավ հանձնաժողովի դրական եզրակացությունը:
