Ամերիաբանկը Ամանորի տոներին նոր ակցիա է սկսում, որի շրջանակներում փոքր ու միջին բիզնեսի համար իր մոտ գործող տոկոսադրույքներից ավելի ցածր տոկոսադրույքներով կարճաժամկետ վարկեր է առաջարկում: Այս մասին, հոկտեմբերի 17-ին, լրագրողների հետ հանդիպման ժամանակ նշեց «Ամերիաբանկ» ՓԲԸ-ի տնօրինության անդամ, մանրածախ գործառնությունների գծով տնօրեն Արման Բարսեղյանը:
Նրա խոսքով, մինչեւ 2018 թվականի ավարտը կարճաժամկետ վարկեր վերցնելու դեպքում ցածր տոկոսադրույքները կգործեն մինչեւ 2019 թվականի մարտի 1-ը: Մասնավորապես, դրամով վարկերի դեպքում տոկոսադրույքը կկազմի 9,44 տոկոս, դոլարի դեպքում՝ 6,94 տոկոս, իսկ եվրոյի դեպքում՝ 5,3 տոկոս:
«Այդ տոկոսադրույքները կգործեն այն դեպքում, եթե վարկը մինչեւ 2019 թվականի մարտի 1-ը ամբողջությամբ մարվի: Եթե վարկառուն երկարաձգի վարկի սպասարկումը, կգործեն բանկի համար ստանդարտ տոկոսադրույքները»,-ասաց Բարսեղյանը:
Բանկի կողմից առաջարկվող մեկ այլ նորություն է բժշկական, ավտոտեխսպասարկման եւ այլ ծառայությունների ֆինանսավորումը:
