Անհրաժեշտ է շնորհակալություն հայտնել Հայաստանում ԱՄՆ հեռացող դեսպան Ռիչարդ Միլսին այն բանի համար, որ նրան հնարավորություն է տրվել արտահայտելու դիրքորոշումը, որը պաշտոնական մակարդակով նրա երկրի իշխանությունները չեն կարող բարձրաձայնել: Հոկտեմբերի 18-ին լրագրողների հետ հանդիպման ժամանակ այսպիսի կարծիք հայտնեց Հայաստանի առաջին օմբուդսմեն, իրավապաշտպան Լարիսա Ալավերդյանը:
Նրա խոսքով՝ քանի որ Հայաստանում տեղի է ունեցել քաղաքական իշխանության փոփոխություն, ղարաբաղյան հակամարտության կարգավորման բանակցային գործընթացը, հնարավոր է, ակտիվանա: «Մենք այսբերգի գագաթն ենք տեսնում: Իրականում քաղաքական գործընթացներն այն ժամանակ են ակտիվանում, երբ երկրում իշխանափոխություն է կատարվում: Երբ Հայաստանի նոր վարչապետ Նիկոլ Փաշինյանը հայտարարեց, որ ինքը կներկայացնի միայն Հայաստանը, բոլորս դրան տարբեր կերպ արձագանքեցինք»,- պարզաբանեց Ալավերդյանը:
Նրա կարծիքով՝ Փաշինյանը կարող է փոխել ղարաբաղյան հակամարտության կարգավորման քաղաքական գործընթացը, քանի որ ավելի պակաս է կախված այն որոշումներից, որոնք ընդունել են առաջին, երկրորդ եւ երրորդ նախագահները:
Լարիսա Ալավերդյանը հերթական խիստ քննադատությանը ենթարկեց, այսպես կոչված, Մադրիդյան սկզբունքները՝ դրանք անընդունելի անվանելով:
Հիշեցնենք, որ Հայաստանում ԱՄՆ հեռացող դեսպան Ռիչարդ Միլսը EVN Report-ի հետ հարցազրույցում անդրադարձել էր ղարաբաղյան հակամարտության կարգավորմանը: Նա, մասնավորապես, հայտարարել էր, որ դաժան իրականությունն այն է, որ ղարաբաղյան հակամարտության ցանկացած կարգավորում պահանջում է «օկուպացված տարածքների» մի մասի վերադարձ, չնայած այնպիսի իրադարձությունները, ինչպիսին էր 2016 թվականի ապրիլյան պատերազմը, դա հայ ժողովրդի համար առավել դժվար է դարձնում: