Կերչի քոլեջում հրաձգությունը, որի հետեւանքով 20 մարդ է զոհվել, գլոբալիզացիայի արդյունք է, «այդ թվում՝ սոցցանցերի»։ Նման կարծիք է հայտնել ՌԴ նախագահ Վլադիմիր Պուտինը՝ ելույթ ունենալով «Վալդայ» բանակցային ակումբի ամենամյա նիստում՝ տեղեկացնում է РБК-ն։

Պուտինը նաեւ կարծիք է հայտնել, որ այս դեպքի վրա ազդել են «ԱՄՆ-ում հայտնի ողբերգական իրադարձությունները»։

«Անկայուն հոգեկան աշխարհով երիտասարդներն իրենց համար ինչ-որ սուտ հերոսներ են կերտում»,- հայտարարել է նախագահը։ Ըստ նրա՝ դա նշանակում է, որ մենք բոլորս, մասնավորապես Ռուսաստանում, եւ աշխարհում «վատ ենք արձագանքում փոփոխվող պայմաններին»։ «Դա նշանակում է, որ մենք երիտասարդների համար պետքական, օգտակար եւ հետաքրքիր կոնտենտ չենք ստեղծում։ Նրանք հափշտակում են հերոսության այդ կեղծիքը։ Դա էլ բերում է նման ողբերգությունների»,- նշել է Պուտինը։

Նախօրեին Կերչի պոլիտեխնիկական քոլեջի 4-րդ կուրսի ուսանող Վլադիսլավ Ռոսլյակովը ուսումնական հաստատությունում ռումբ էր պայթեցրել եւ կրակ բացել։ Հրաձիգը, ով ինքնասպան էր եղել, եւ 20 մարդ զոհվել էին։ Մի քանի տասնյակ մարդ վիրավորվել էր։

Ղրիմում եւ Սեւաստոպոլում հոկտեմբերի 18-ից եռօրյա սուգ է հայտարարված։