Սիրիայում Ռուսաստանը գործողություն է սկսել ահաբեկչության սպառնալիքի պատճառով: Այս մասին հայտարարել է ՌԴ նախագահ Վլադիմիր Պուտինը՝ «Վալդայ» բանավեճի ակումբում նիստի ժամանակ, փոխանցում է ՌԲԿ-ն:
«Իհարկե նա (ահաբեկչությունը) մեր երկրին եւս շատ մեծ սպառնալիք է ներկայացնում: Հենց այս պատճառով մենք Սիրիայում ակտիվ գործողություններ սկսեցինք»,- ասել է Պուտինը: Նրա խոսքով՝ ահաբեկչությունը սպառնալիք է ներկայացնում նաեւ հարեւան պետություններին: Նա հավելել է, որ Ռուսաստանը գլոբալ առումով ահաբեկչությանը չի հաղթել, սակայն հաջողվել է այս երեւույթին «վիթխարի վնաս» հասցնել:
Նա նշել է, որ Ռուսաստանն «ընդհանուր առմամբ, հասել է այն նպատակներին, որոնք իր առջեւ դրել էր» մինչեւ Սիրիայում գորոծողությունների մեկնարկը, փոխանցում է «Ինտերֆաքսը»: Ըստ նրա՝ երեք տարում հաջողվել է ազատել Սիրիայի տարածքի փաստացի 95 տոկոսը. «Սա առաջինը: Երկրորդ՝ մենք այնտեղ պետականություն ենք հաստատել, թույլ չենք տվել պետականությանը, որպես այդպիսին, փլուզվել»:
Պուտինը շնորհակալություն է հայտնել թուրք գործընկերներին Սիրիայի իրավիճակի կարգավարման գործում օգնության համար՝ նշելով, որ նրանք կատարում են իրենց պարտավորությունները, փոխանցում է «ՌԻԱ Նովոստի»-ն: «Նրանք աշխատում են, եւ մենք դա տեսնում ենք: Ցանկանում եմ այս կապակցությամբ մեր թուրք գործընկերներին շնորհակալություն հայտնել»,- հայտարարել է նա՝ հավելելով, որ դեռեւս ոչ ամբողջ ծանր սպառազինությունն է դուրս բերված, ահաբեկչական կազմակերպությունների ոչ բոլոր գրոհայիններն են տարածքը լքել, սակայն «թուրք գործընկերները ամեն ինչ անում են պարտավորությունները կատարելու համար»:
«Նրանք բավականին կոշտ եւ միանգամայն արդյունավետ են գործում»,- հավելել է Պուտինը:
