ՀՅԴ խմբակցության առաջարկը՝ Ընտրական օրենսգրքի նախագծում ամրագրել, որ համամասնական ցուցակները լինեն բաց, «Ելքի» պատգամավոր Հովիկ Աղազարյանը լավ գաղափար է համարում։
NEWS.am-ի հետ հարցազրույցում նա ասաց. «Բաց ցուցակների գաղափարը բավականին լավն է, բայց այսօր դրանք շատ դժվար է իրականացնել ժամկետի առումով եւ մասնագետների։ Դա ճիշտ, բայց վաղը չէ մյուս օրվա գաղափար է»։
Նա նշեց, որ շտապողականությունը պայմանավորված է հանգամանքով, որ առանց արտահերթ խորհրդարանական ընտրությունների հեղափոխությունը ավարտված համարել չի կարելի։
Ընտրական օրենսգրքի նախագծի շուրջ կոնսենսուս չլինելու հարցը մեկնաբանելով՝ նա ասաց, որ չնայած դրան նախագիծը կընդունվի։
«Կարծում եմ՝ կընդունվի, քննարկումների ընթացքում որոշակի ընդհանրությունների եկել ենք, մասնավորապես շեմի իջեցման մասով։ Մեր խմբակցությունը քննարկել է նաեւ ԲՀԿ առաջարկը 2 տոկոսի մասին եւ համաձայնության ենք եկել, որ 4–րդ ուժը պետք է գոնե 2 տոկոս հավաքի, որ կարողանա ներկայություն ունենա խորհրդարանում, իսկ ինչ վերաբերում է բաց եւ փակ ցուցակներին, ես չեմ կարծում, որ այստեղ այնքան հսկայական է տարբերությունը, որ չկարողանանք կոնսենսուսի գալ»,–ասաց Հովիկ Աղազարյանը։