«Ալյանս» կուսակցության վարչությունը որոշում է կայացրել արտահերթ խորհրդարանական ընտրություններին սեփական ցուցակով առանձին մասնակցելու վերաբերյալ։
Կուսակցությունից NEWS.am-ին հայտնում են, որ ցուցակը գլխավորելու է ՀՀ ԱԺ կրթության, գիտության, մշակույթի, սպորտի եւ երիտասարդության հարցերով մշտական հանձնաժողովի նախագահ, «Ծառուկյան» խմբակցության պատգամավոր Տիգրան Ուրիխանյանը։
Տարածված հաղորդագրության մեջ նաեւ ասվում է. «Ցուցակում ներկայացված են լինելու մի շարք բացառիկ քաղաքական ու պետական գործիչներ, տնտեսագետներ, գիտության ու մշակույթի վառ ներկայացուցիչներ։ Այն կներկայացվի նախընտրական արշավի սկզբում:
«Ալյանսը» միշտ պայքարել է ՀՀԿ-ական մենիշխանության դեմ, եղել է առանց շեղումների ընդդիմադիր, հիմա սատարում է հեղափոխական իշխանությանը եւ, ըստ օրենքի պահանջի, ձեւավորելու է այն չորս խմբակցություններից մեկը, որը, ներդնելով ինտելեկտ ու փորձառություն, միասնաբար աշխատելու է Հայրենիքի զարգացման համար»:
Նշենք, որ Տիգրան Ուրիխանյանը նախորդ ԱԺ-ում եղել է ԲՀԿ խմբակցության պատգամավոր, խմբակցության մամուլի քարտուղար, իսկ գործող ԱԺ-ում «Ծառուկյան» խմբակցության անդամ է: