Հայաստանում տեղական ինքնակառավարման ընտրությունների անցկացման համար պետք է մեկ միասնական օր ընտրվի։ Նման կարծիք այսօր՝ հոկտեմբերի 19–ին լրագրողների հետ հանդիպմանը հայտնեց Հայաստանի համայնքների միության նախագահ Էմին Երիցյանը։
«Ամբողջ աշխարհում ընդունված է, որ տեղական ինքնակառավարման մարմինների ընտրությունները կայանան միևնույն օրը, սակայն Հայաստանում տարիների ընթացքում հրաժարականների և այլ խնդիրների պատճառով ընտրությունները տարվա տարբեր օրերի են անցկացվել»,–նշեց նա։
Համայնքների միության նախագահն առաջարկում է համայնքի ղեկավարի լիազորությունների վաղաժամ դադարեցման դեպքում ավագանու որոշմամբ համայնքի ղեկավարի ժամանակավոր պաշտոնակատար նշանակել համայնքապետի տեղակալին կամ աշխատակազմի ներկայացուցիչներից որևէ մեկին։
«Օրինակ, մինչև ընտրությունների միասնական օրը՝ ավագանու որոշմամբ համայնքի ղեկավարի ժամանակավոր պաշտոնակատար կարող է նշանակվել համայնքի ղեկավարի տեղակալը»,–առաջարկեց նա՝ հավելելով, որ այս փոփոխությունը լավ իրավական հիմքեր կստեղծի համայնքի ղեկավարի նշանակման գործում պետության միջամտությունը բացառելու համար։
Հիշեցնենք, որ հոկտեմբերի 21-ին Հայաստանի 9-ը մարզերի 49 համայնքում՝ այդ թվում Հրազդանում, Էջմիածնում, Արմավիրում և Կապանում տեղի կունենան տեղական ինքնակառավարման մարմինների ընտրություններ: