Ջամու եւ Քաշմիր նահանգում անվտանգության ծառայության եւ զինյալների միջեւ դիմակայության հետեւանքով զոհված խաղաղ բնակիչների թիվը աճել է՝ հասնելով 6-ի, 40 մարդ էլ վիրավորվել է, հայտնում է «ՌԻԱ Նովոստի»-ն՝ վկայակոչելով NDTV հեռուստաալիքը։
«Վեց մարդ է զոհվել։ Մենք փորձում ենք պարզել, թե ինչ է պատահել եւ ինչ պայթուցիկ է դա եղել»,- հեռուստաալիքը մեջբերում է ոստիկանության գլխավոր տեսուչ Սվայամա Պրակաշա Պանիի խոսքերը։
Ավելի վաղ նշվել էր մեկ զոհված խաղաղ բնակչի մասին եւ 30 վիրավորների։ Կիրակի օրը առավոտյան բախում է տեղի ունեցել Կուլգամ շրջանում անվտանգության ծառայության եւ ենթադրյալ զինյալների միջեւ, նրանցից երեքը չեզոքացվել են կրակահերթի ժամանակ։ Այդ ժամանակ դեպքի վայրում հավաքվել են խաղաղ բնակիչներ, որտեղ շուտով պայթյուն է որոտացել։