ԱՄՆ-ն վաղուց է փորձում Սեւ ծովում ռազմանավեր տեղակայել՝ օգտագործելով Վրաստանի եւ ՆԱՏՕ-ի միջեւ դաշինքը: Այս մասին NEWS.am-ի հետ զրույցում ասաց պատմական գիտությունների թեկնածու, Ռուսաստանի պետական հումանիտար ինստիտուտի տարածաշրջանային եւ արտաքին քաղաքականության ամբիոնի դոցենտ, քաղաքագետ Սերգեյ Մարկեդոնովը:
Քաղաքագետի կարծիքով՝ Վաշինգթոնը կփորձի Արեւելյան Անատոլիայում բազաներ ստեղծել, որպեսզի այնտեղ տեղակայի իր զինծառայողներին, եւ պահանջի իր տրամադրության տակ դնել մի շարք թուքական նավահանգիստներ:
«Իրադարձությունների նման ընթացքը կարող է Անդրկովկասի իրավիճակը սկզբունքորեն փոխել: Ամերիկացի շատ փորձագետների գնահատմամբ՝ այս տարածաշրջանում ԱՄՆ-ն սկսել է իր ազդեցությունը կորցնել Վաշինգթոնի կողմից նրա հանդեպ հետաքրքրության կորուստի պատճառով»,- պարզաբանեց փորձագետը:
Նրա խոսքով՝ Բաքուն, օրինակ, իրականացնելով սեփական գլոբալ էներգետիկ նախագծերը, իրեն ներկայացնելով Եվրոպայի էներգետիկ անվտանգության գրեթե երաշխավոր, Վաշինգթոնի հետ մշտապես համագործակցել է: Մարկեդոնի կարծիքով՝ իսկ հիմա միանգամայն հնարավոր է, որ Բոլթոնն Ադրբեջանին ինչ-որ նոր գաղափարներ կառաջարկի, հնարավոր է՝ Լեռնային Ղարաբաղի հակամարտության հետ կապված, հրաշալի հասկանալով, որ Երեւանին ՀԱՊԿ-ից անմիջապես եւ արագ հեռացնել չի ստացվի:
«Դե իսկ հիմա նա Անդրկովկաս է թռչում անդրկովկասյան պետությունների հետագա քաղաքական կուրսի մասին ավելի հստակ կարծիք կազմելու համար եւ լսելու նրանց ավելի մանրամասն դիրքորոշումն իրանական հարցում»,- եզրափակեց փորձագետը:
Հիշեցնենք, որ ԱՄՆ նախագահի ազգային անվտանգության հարցերով օգնական Ջոն Բոլթոնը հայտնել էր, որ նոյեմբերի 20-ին մտադիր է աշխատանքային այցով Ռուսաստան-Ադրբեջան-Հայաստան-Վրաստան ուղեւորություն կատարել: