Մենք մեծ նշանակություն ենք տալիս «Եվրասիական շաբաթ» համաժողովի անցկացմանը Հայաստանում։ Այս մասին այսօր՝ հոկտեմբերի 22-ին, Երեւանում «Եվրասիական շաբաթ» միջազգային ցուցահանդեսային համաժողովի բացման ժամանակ հայտարարեց ՀՀ վարչապետի պաշտոնակատար Նիկոլ Փաշինյանը։
Նա համոզված է, որ այս փուլում Հայաստանում տեղի է ունենում քաղաքական ու տնտեսական համակարգի խորը տրանսֆորմացիա, ձեւավորվում է արդիական քաղաքական ու տնտեսական օրակարգ։
«Ակնհայտ է, որ այն մեծ մասամբ ձեւավորվում է նաեւ հաշվի առնելով ԵՏՄ ինտեգրացիան ներուժը։ Այս համատեքստում կարծում եմ, որ համաժողովը լավ հարթակ է ինտեգրացիոն գործընթացի միջանկյալ արդյունքներն ամփոփելու համար, հատկապես Միությունում Հայաստանի նախագահության նախօրեին»,–նշել է ՀՀ վարչապետի պաշտոնակատարը։
Միաժամանակ նա շեշտեց, որ արդեն սկսել են քննարկել այն հարցերը, որոնք մտադիր են առաջարկել որպես առաջնահերթություններ ԵՏՄ–ում ՀՀ–ի նախագահությւան ժամանակ։
Բացի այդ, Փաշինյանի խոսքով, այս համաժողովում հնարավորություն կլինի քննարկել ԵՏՄ անդամ երկրների գործարար շրջանակներին անհանգստացնող խոչընդոտները, որոնք դեռ գոյություն ունեն եվրասիական շուկայում եւ մշակել իրական միջոցներ դրանք վերացնելու ուղղությամբ։
ՀՀ վարչապետի պաշտոնակատարը վստահություն հայտնեց, որ եվրասիական շաբաթը կդառնա այն հարթակը, որի շրջանակներում կկնքվեն պայմանագրեր, կքննարկվեն հնարավոր համատեղ նախագծերը եւ նոր գործարար կապեր կհաստատվեն։
«Ուրախալի է, որ համաժողովին այսօր մասնակցում են ավելի քան 300 հայկական ձեռնարկություններ, որոնք պատրաստ են եվրասիական գործընկերների հետ երկարաժամկետ համագործակցությանը, ներդրումների ներգրավմանը եւ գործընկերային փոխգործակցության հաստատմանը»,–շեշտեց Փաշինյանը
Հենց այդ ձեռնարկատերերի ներկայությունը, նրա կարծիքով, ապացուցում է համաժողովի նկատմամբ բարձր հետաքրքրվածությունն ու համաժողովի շրջանակում կոնկրետ որոշումների մշակման կարեւորությունը։
