Ռուսաստանը ձեռնարկատիրական միջավայրի հարցում մի քանի դիրքերում բավականին առաջ է ընթացել եւ կարող է իր փորձը փոխանցել եվրասիական տարածքի գործընկերներին: Այս մասին հոկտեմբերի 22-ին Երեւանում մեկնարկած «Եվրասիական շաբաթ» միջազգային գործնական համաժողովի ժամանակ հայտարարեց ՌԴ առաջին փոխվարչապետ, ֆինանսների նախարար Անտոն Սիլուանովը:
Սիլուանովի կարծիքով՝ եվրասիական տարածքում ձեռնարկատիրական միջավայրի բարելավումը նախատեսում է ԵՏՄ անդամ երկրների համատեղ ջանքեր եւ միասնական նորմատիվային ակտերի ընդունում:
Նա ներկայացրեց ռուսական փորձը, որը, նրա խոսքով, երկրին թույլ է տվել իր բիզնես կլիման զգալիորեն բարելավել:
«2012 թվականին Ռուսաստանը Համաշխարհային բանկի Doing business վարկանիշում գտնվել է 120-րդ տեղում: Եվ այդ ժամանակ խնդիր էր դրվել բարելավել ձեռնարկատիրական գործունեության պայմանները ու մտնել քսանյակի մեջ: Ռուսաստանը 6 տարում 120-րդ տեղից բարձրացել է 35-րդ տեղ»,- պարզաբանեց ՌԴ առաջին փոխվարչապետը:
Ընդ որում՝ նա հիշեցրեց, որ Ռուսաստանում ձեռնարկատիրական միջավայրը բարելավվել է, եւ դա ընդունում են բիզնես միկջավայրի բոլոր ներկայացուցիչները:
«Մենք վերլուծել ենք այն դիրքերը, որոնցով հետ էինք մնում համաշխարհային ստանդարտներից եւ առանցքային դիրքերի իրականացման «ճանապարհային քարտեզներ» մշակել»,- շեշտեց ՌԴ ֆինանսների նախարարը:
Սիլուանովի հավաստմամբ՝ այս բոլոր գործողությունները վերահսկվել են ոչ միայն ՌԴ կառավարության կողմից, այլեւ բուն բիզնեսի: Ըստ որում, նրա խոսքով, յուրաքանչյուր նախաձեռնության իրականացումը հաջողված է համարվել միայն այն բանից հետո, երբ բիզնեսի կողմից դրական արձագանքներ են ստացվել:
«Հիմա խնդիր է դրված այս դրական փորձը տարածել Ռուսաստանի տարածաշրջաններում»,- ասաց ՌԴ ֆինանսների նախարարը:
Նա համոզմունք հայտնեց, որ ռուսական փորձը կհետաքրքրի եվրասիական տարածքի գործընկերներին՝ հավելելով, որ իրենք արդեն ընդունել են եվրասիական տարածքի Մաքսային օրենսգիրքը:
«Ինձ թվում է, որ որքան շատ ընդունենք նման ընդհանուր, միավորող նորմատիվ ակտեր, որոնք ներառում են լավագույն պրակտիկան, այնքան ձեռնարկատիրության համար լավագույն պայմաններ կստեղծենք»,- կարծում է Սիլուանովը:
Դրանից զատ, նա համոզված է, որ դրա շնորհիվ Ռուսաստանում աճի տեմպերը կբարձրանան, իսկ ՌԴ քաղաքցիներն ավելի հարուստ կդառնան, ինչը բխում է նրանց շահերից:
