Իշխանության ներկայացուցիչները պատրաստ են քննարկել աջակողմյան ղեկով ավտոմեքենաների ներմուծման հետ կապված խնդիրը: Այս մասին լրագրողների հետ հանդիպման ժամանակ հայտնեց Հայաստանում ճապոնական «Autocom Japan» ընկերության մասնաճյուղի ներկայացուցիչ Արտեմ Դավթյանը:
Փորձագետ Արթուր Միսաքյանն, իր հերթին, նշեց, որ այսօր իրենք ԱԺ շենքի մոտ հանդիպել են պատգամավորներ Ալեն Սիմոնյանի եւ Էդմոն Մարուքյանի հետ, այնուհետեւ հանդիպում է կայացել տրանսպորտի, կապի եւ տեղեկատվական տեխնոլոգիաների նախարարի պաշտոնակատար Հակոբ Արշակյանի հետ:
«Հանդիպումների արդյունքներով իշխանությունների ներկայացուցիչները հայտարարել են հարցը քննարկելու եւ ընդունելի որոշում կայացնելու պատրաստակամության մասին»,- ասաց փորձագետը:
Միսաքյանը նշեց, որ այս հարցի լուծումը 2 տեսակետից է կարեւոր: Առաջին՝ սա քաղաքացիների համար անձնական օգտագործման աջակողմյան ղեկով ավտոմեքենաների հասանելիության հարցի լուծումն է: Քաղաքացիների երկրորդ կարգի մեջ են մտնում այն մարդիկ, որոնք զբաղվում են ԵՏՄ երկրներից, մասնավորապես՝ Ռուսաստանից եւ Ղազախստանից, ինչպես նաեւ Ուկրաինայից Հայաստան ներկրված ճապոնական աջակողմյան ղեկով ավտոմեքենաների վերավաճառքով:
Նա նշեց, որ գրեթե 150 աջակողմյան ղեկով ավտոմեքենաներ կանգնած են հայ-վրացական սահմանին, Բագրատաշենի հսկիչ-անցակետում: Դրանց ներկրումը Հայաստան արգելված է օրենքով, իսկ հոկտեմբերից հետո դրանց սեփականատերերը կտուգանվեն տարանցման համարների ժամկետի սպառման պատճառով: Սա նշանակում է, որ այս ավտոմեքենաների տերերը ամեն օր ֆինանսական կորուստներ կունենան:
Հիշեցնենք, որ Ազգային ժողովը մարտի 1-ին ընդունել է «Հայաստան աջ ղեկով մարդատար ավտոմեքենաների ներկրման ժամանակավոր արգելքի մասին» օրինագիծը, որի համաձայն՝ 2018 թվականի ապրիլի 1-ից հոկտեմբերի 1-ը արգելվում է Հայաստան աջ ղեկով ավտոմեքենաների ներկրումը, մինչդեռ արդեն ներմուծված ավտոմեքենաների շահագործումը չի արգելվում: