Հայոց ցեղասպանությունը պատմական փաստ է։ Այս մասին այսօր՝ հոկտեմբերի 22-ին, լրագրողների հետ զրույցում հայտարարել է Նյու Յորքի նախկին քաղաքապետ, ԱՄՆ նախագահի կիբեռանվտանգության հարցերով խորհրդական Ռուդոլֆ Ջուլիանին։
Հարցին՝ պետք է արդյոք ԱՄՆ նախագահ Դոնալդ Թրամփի վարչակազմը ճանաչի Հայոց ցեղասպանությունը, Ռուդոլֆ Ջուլիանին նշեց. «Ես ճանաչում եմ Հայոց ցեղասպանությունը։ Դա պատմական փաստ է։ Սակայն ես այստեղ եմ գտնվում մասնավոր այցով»։ Նրա խոսքով՝ ճանաչման հարցով պետք է անմիջապես վարչակազմը զբաղվի։
Ավելի վաղ հայտնել էինք, որ Նյու Յորքի նախկին քաղաքապետ, ԱՄՆ նախագահի կիբեռանվտանգության հարցերով խորհրդական Ռուդոլֆ Ջուլիանին այցելել է Ծիծեռնակաբերդի Հայոց ցեղասպանության զոհերի հուշահամալիր: Նա այցելել է Ցեղասպանության Ինստիտուտ-թանգարան:
Ջուլիանին Երեւան է ժամանել մասնակցելու Եվրասիական գործընկերության 3-րդ միջազգային համաժողովին: