ՄԱԿ գլխավոր քարտուղար Անտոնիու Գուտերիշը հուսով է, որ Միացյալ Նահանգներն ու Ռուսաստանը կկարողանան կարգավորել Փոքր եւ միջին հեռահարության հրթիռների ոչնչացման պայմանագրի շուրջ ծագած տարաձայնությունները։ Այս մասին տեղեկացրել է գլխավոր քարտուղարի պաշտոնական ներկայացուցչի տեղակալ Ֆարխան Հաքը՝ մեկնաբանելով համաձայնագրից դուրս գալու մասին Դոնալդ Թրամփի հայտարարությունը։
Հաքը հիշեցրել է, որ դեռեւս մայիսին Ժնեւի համալսարանում իր ելույթի ժամանակ գլխավոր քարտուղարը, դիմելով ե՛ւ Ռուսաստանին, ե՛ւ ԱՄՆ-ին, կոչ էր արել լուծել իրենց տարաձայնությունները, հասնել Պայմանագրի երկարաձգմանը եւ քայլեր ձեռնարկել միջուկային զենքի կրճատման ուղղությամբ։
Հոկտեմբերի 20-ին ԱՄՆ նախագահ դոնալդ Թրամփը հայտարարել է, որ իր երկիրը դուրս կգա ՓՄՀՀՈ պայմանագրից, քանի որ Ռուսաստանն իբր այն խախտում է։